DILI, STLTIMORLESTE.com – Prezidente Republika (PR), Jose Ramos Horta partisipa eventu boas vindas ba funsionariu foun 2026 iha kompanhia Tsuneishi Timor ShipBuilding neebe halao iha Hotel Timor.
Iha biban nee Prezidente Republika Jose Ramos Horta ba jornalista sira iha Hotel Timor, Kuarta nee (10/06/2026) hatete, eventu nee Embaixador Japaun ba Timor Leste, Yamamoto Yasushi ho kompanhia Tsuneishi Timor ShipBuilding mak konvida atu koalia ba joven trabalhador sira neebe atu ba simu formasaun iha Timor nomos iha Japaun, grupu ida iha ona Japaun kleur ona, sira rekruta joven ho kursu enjeneria iha UNTL no fatin seluk tan.
“Projetu nee lao dadaun projetu boot diak ba Timor Leste nia futuru, hau espera Governu book aan mos lalais tanba buat barak iha governu nee demora iha Ministeriu sira, Ministru sira tenke hatene ekonomia hatene investimentu saida? se lahatene, favor estuda rai seluk nia, Indonezia nia, ka Xina, Vietname nia sira halo oinsa, projetu nee ita tenke fo intensivu hotu hotu ba sira hanesan eliminasaun impostu, ba tinan 30 ka 50 liu tan.
PR Horta dehan, importante liu ba Timor fabrika estaleiru nee ba oin kria empregu, empregu neebe senior ho osan manan boot no sira neebe iha skill hamutuk rihun haat nemak importante liu ba ekonomia kriasaun de empregu, laos Ministeriu Finansas laiha idea seluk hatene deit mak kobre impostu.
“Maibe oinsa mak o kobre impostu se ekonomia lalao, nee duni ita tenke fo intensivu lalais book aan, buat barak lao neneik los nee duni hau apoiu 100% ba projetu ida nee tanba diak ba futuru rai ida nee nia, hau agradese Embaixada Japaun ho kompanha ke sira halo desizaun atu halo investimentu boot iha nee, ida nee nivel mundial nee duni hau mai marka prezensa ho embaixador ho kompanha,” katak PR Horta.
Alende nee konaba projetu enerjia solar iha Manatutu mos seidauk lao, ida nee halo prezidente la komprende, halo buat hotu demora. La hatene ministru sira nia grau estudu iha neebe? Karik lahatene loke livru estuda Singapura halo oinsa, Vietname halo oinsa Indonezia halo oinsa, demora bebeik projetu nee tinan 3 ona. Projetu solar iha laleia nee se lalao, entau projetu harii konstrusaun Roo Ahi nemos lalao tanba eletrisidade karun demais investimentu nee boot tebes.
Nunee mos Embaixador Japaun ba Timor Leste, Yamamoto Yasushi sente ondradu hamutuk iha okaziaun memoravel ida-nee, iha biban nee embaixador mos hatoo parabens ba enjeneiru joven no talentu nain 19 neebe hahu sira nia viajen.
“Loron ohin importante laos deit ba imi ida-idak, maibe mos ba futuru nasaun nia. Ita boot sira laos deit tama iha empreza, ita-boot sai parte ida husi viajen ida neebe boot liu atu harii empregu sira, hametin industria no loke posibilidade foun, husi nasaun ida-nee. Lakleur hafoin hau hahu hau nia mandatu nuudar embaixador ba Timor Leste iha fulan Janeiru, hau vizita eskritoriu ba edifísiu kadeira Tsunade Timor, hau sente impresionadu tebes bainhira haree joven Timor oan badinas lao ho fiar-an no entuziazmu,” dehan Embaixador.
Nia mos husu joven sira dezenvolve abilidade espesializada sira liu husi formasaun intensivu no sente orgullu ho sira nia serbisu. Ba membru foun sira neebe ohin tama, hein banati tuir funsionariu tuan sira nia ain-fatin, buka suporta malu, simu dezafiu sira ho aten-barani.
“Abilidade sira neebe ita-boot sei hetan iha nee sei sai hanesan rikusoin ida. Laos deit ba imi-nia an rasik, maibe mos ba imi-nia komunidade sira no rai ida nee,” katak nia.
Nunee mos Prezidente Tsuneishi Timor ShipBuilding, Okumura Sachio hatoo agradese ba Prezidente Republika, Embaixador Japaun mai Timor Leste nomos partisipante hotu neebe hamutuk iha eventu boas Vindas nee.
“Tsuneishi Timor ShipBuilding harii iha tinan 2024 no ami hahu ho dezafiu iha rai Timor Leste, ho funsionariu nain 19, maibe agora ami nia funsionariu nain 58 ona, ida nee importante atu dezenvolve timor oan sira atu bele exporta industria tuir rai ida nee nia, hau rasik mos mai serbisu iha TL iha tinan 2024 no loron loron hau sente kapasidade boot liu tan iha rai ida nee,” dehan nia.
Nia hatete, Tsuneishi Timor ShipBuilding laos hanesan kompanhia deit maibe sai hanesan mos fatin ida dezenvolve ema iha industria iha Timor Leste, no objetivu mak hamutuk ho povu Timor Leste tanba konstrusaun estaleiru mos importante tebes, maibe importante liu mak timor oan sira tenke aumenta kapasidade atu kontrui ho liman rasik.
(eme)
