DILI, STLTIMORLESTE.com – Prezidente Republika (PR), Jose Ramos Horta husu Governu no deputadu sira iha Parlamentu Nasional (PN) lalika lakon tempu debate alterasaun ba kodigo penal atu kriminaliza defamasaun, diak liu aselera projetu sira hodi kria empregu.
Prezidente Republika, Jose Ramos Horta hatoo kestaun nee ba jornalista sira iha Hotel Timor, Kuarta (10/06/2026) hatete, duke Governu preokupa fali ida nee, diak liu aselera investimentu projetu sira kria empregu, lalika preokupa fali ho alterasaun ba kodigo penal atu kriminalizasaun defamasaun.
“Tanba defamasaun nee laos mai deit husi media, maibe mai husi politiku sira koalia tun sae iha parlamentu nee, entaun politiku sira bele halo akuzasaun oin oin inklui kontra Primeiru Ministru, kontra Prezidente nee defamasaun oin oin maibe sira iha imunidade, agora jornalista oan sira hakerek buat oan ruma nee labele iha imunidade, diak liu lalika preokupa ho ida nee, ita halo Timor hanesan nafatin liberdade imprensa 100%, tanba ho media sosial atual iha mundu nee o atu halo sensiosip oinsa los. Nee duni hau hatete lalika lakon tempu koalia ida nee no lalika lakon tempu iha parlamentu koalia ida nee, konsentra iha ekonomia, no konsentra ba lei neebe atu fasilita investimentu,” dehan Prezidente Republika.
Prezidente haktuir tan katak, diak liu lalika lakon tempu ho lei nee, hatun tiha lei ruma neebe limite liberdade imprensa, para Timor kontinua sai ezemplu diak ba mundu tomak, tanba joven sira, povu iha tempu luta mate lubuk ida para hetan liberdade, lo-loos Timor tenke kontinua nunee, tanba ema barak iha mundu admira Timor Leste liberdade imprensa diak los.
Karik Parlamentu Nasional avansa atu debate konaba alterasaun ba kodigo penal atu kriminaliza defamasaun, lori ba Prezidente Republika promulga kalae? hatan ba kestaun nee Prezidente Republika hatete sei haree saida mak Parlamentu haruka ba Prezidente husu promulga nee, maibe se atu kriminaliza defamasaun husi media Prezidente sei la promulga.
Xefe Estadu hatete, se hakarak kriminaliza defamasaun tenke hahu mos iha parlamentu nasional kedas, kuandu parlamentu rasik halo defamasaun ba malu, inves koalia politika diak ba rai maibe koalia tun sae halo akuzasaun tun sae nee mos defamasaun, se parlamentu hakarak ida nee entau sukat buat hotu ho didiak.
Maibe atu limita liberdade imprensa Prezidente Republika rasik sei la simu desizaun ida nee bainhira haruka mai Prezidente rasik sei la promulga.
Foin lalais komisaun A neebe trata asuntu konstituionais no Justisa iha Parlamentu Nasional (PN) hahu halo audiensia hodi rona hanoin husi entidade relavante kona ba inisiativa atu halo alterasaun ba lei asedu seksual, insestu nomos defamasaun.
(eme)
