DILI, STLTIMORLESTE.com – Tribunal Judisial Primeira Instansia Dili (TJPID) kontinua halao prosesu julgamentu ba krime pekulatu neebe deskonfia envolve husi arguidu nain tolu hanesan membru PNTL ho inisial BdJ, LLG no DM.
Prosesu refere, antes nee Tribunal rona ona deklarasaun husi arguidu sira hotu no sasin, tanba nee atu tama ba iha faze ikus, arguidu BdJ hato rekerimentu ba iha Tribunal husi atu halo akaresaun ho arguidu DM.
Iha sala julgamentu laran arguidu BdJ deklara katak, nia parte hatama ona rekerimentu ida, husu ba iha Tribunal autoriza hodi halo akaresaun entre arguidu BdJ ho arguidu DM, tanba konsidera deklarasaun arguidu DM nian balu sei kontradiz.
Arguidu deklara katak, nia parte la satisfaz ho akuzasaun neebe maka iha, tanba nee nia parte husu ba iha Tribunal, atu akaresaun nee tenke lao.
Rona tiha arguidu nia deklarasaun, Juiz prosesu mos deklara katak, arguidu DM oras nee iha hela rai liur, tanba nee Tribunal sei marka loron ida hodi halo akaresaun entre arguidu nain rua, maibe via whatsap.
Rona tiha ida nee arguidu BdJ mos aseita. Ho ida ne Tribunal adia julgamentu ba iha loron 1 fulan Junho oras tuku 11:00, hodi halo akaresaun entre arguidu nain rua.
Iha indisus sufisiente katak, Sekretaria Estadu Siguransa aprejenta relatoriu audit halao husi Gabinete Inspesaun no Auditoria, konaba dividas PNTL ba iha Kompania TOLL Timor Leste ligadu ho strattamentu kombustivel iha fulan Fevereiru nomos Marsu tinan 2013, akontese iha Lojistika Nasional.
Aprovisionamentu PNTL asina kontratu ho kompañia TOLL Timor Leste fornese kombustivel hahu husi loron 01 Janeiru 2013 too 31 Marsu 2013.
Rejultadu inspessun refere detekta, abastamentu kombustivel ba iha fulan Fevereiru tinan 2013, ba iha kareta tanki matrikula 02-3246, ho kapasidade 3000litrus atesta ho total 6,720Ltrs de gazoel, tuir GIS-SES iha indikasaun naok.
Rejulta katak, arguidu LLG, DM, no BdJ serbisu hamutuk hodi hasai mina husi kompañia TOLL Timor Leste, no atesta ituan deit iha tanki mina PNTL, no mina barak maka arguidu sira fan no osan sira fahe ba malu.
Total kombustivel fornese husi Kompañia TOLL Timor Leste iha fulan Fevereiru 2013 ho total 6,720 ltrs gazoel ho total osan US$ 9, 818,07.
Indisia katak kombustivel fornese husi Kompania TOLL ho kapasidade 6,613ltrs ho osan US$ 8,336.90 atesta iha fulan Marsu 2013 arguidu LLG tula balun ba fan nomos balun ense ba iha tenki sira.
Iha loron 17 fulan Janeiru tinan 2014 membru PNTL, Lojistika Nasional LLG no DM lori kombustivel Gazoel no Gasolina entrega ba iha UPF iha Oecuse la tuir kapasidade neebe maka sira solisita.
Iha loron refere kompañia UPF Charli Enklave Oecusse simu deit kombustivel Gazoel 620 litrus no Gasolina 500.
Tuir invois total kombustivel no Gazolina 3000 Litrus ho detailu kombustivel Gasoel total 1000litrus ho kombustivel Gazolina 2000Litrus, maibe realidade fornese deit 1,120litru. Restu husi kombustivel refere, arguidu nain tolu ense tiha ba kareta sira.
Mesmu hanesan nee arguidu BdJ iha fali 28 Janeiru tinan 2014, ho pozisaun hanesan Direktor Lojistika Nasional kontinua asina iha invois hato husi kompania Ruvie Fuel Lda, kombustivel ho kuantidade 1000ltrs fornese ba PNTL UPF no 2000ltrs fornese ba PNTL UPF Oecusse ho total invois US$ 4,500.00 husi finansas PNTL.
Arguidu LLG no DM hetan kondenasaun, tanba kazu fan mina, akontese iha loron 10 fulan Maiu tinan 2014, fornese husi kompañia RUVIC Fuel.
Iha tinan 2014 arguidu BdJ entrega senha kombustivel ba arguidu LLG no DM hodi arguidu BdJ iha kunhesimentu katak arguidu LLG no DM sira atu fan ho total osan apuradu durante produsaun provas US$ 39, 235.00.
Atitude arguidu sira nian kaer toman wain hira halo kapturasaun sidadaun nain tolu, neebe maka uza kupon sosa mina husi arguidu LLG no DM.
Iha buska no aprensaun iha LLG no DM hetan senha kombustivel iha sira nia uma, ho total 50 folhas ekivalen ho montante US$ 250.00.
Objetivu arguidu BdJ haruka arguidu LLG no DM fan senha kombustivel, atu nunee arguidu BdJ bele transfere ba iha Indonesia Surabaya, hodi selu nia oan nia eskola no selu arendamentu uma, inklui sosa tiket Dili-Bali-Surabaya.
Konsekuensia husi nee Estadu RDTL sofre prejuizu husi arguidu sira nia hahalok ho montante gazoel ho total (Fevereiru US$ 9, 818,07 nomos Marsu US$ 8,336.90) US$ 18, 154.97.
Tanba nee MP akuza arguidu BdJ, hanesan autor material ba Krime Pekulatu previstu iha artigu 295, no Krime trafiku de influensia 10/19.
Arguidu LLG hanesan autor material ba krime Pekulatu tuir artigu 295 husi Kodigu Penal ho forma kontinuadu.
Arguidu DM hanesan autor material, ba pratika krime Pekulatu artigu 295 husi Kodigu Penal ho forma kontinuadu.
Audiensia julgamentu nee prezide hosi Juiz koletivu Juiza Ercilia de Jesus, Ana Paula Fonseca, José Maria de Araujo, Ministeriu Publiku reprezenta husi Prokuradora Lidia Soares, arguidu sira hetan asistensia legal husi Advogadu Privadu, no Defensor Publiku.
(ter)
