DILI, STLTIMORLESTE.com – Partidu FRETILIN sei deside Kandidatura Prezidente Republika liu husi reuniaun Komite Sentral FRETILIN iha fulan Julhu lae Agostu tinan nee.
Adjuntu Sekretariu Jeral Partidu FRETILIN, Flavio Maria da Silva hatete, hanesan ema hotu-hotu hatene eleisaun Prezidensial dala hira Partidu FRETILIN sempre iha ninia kandidatu atu kompete iha eleisaun prezidensial.
Nia dehan, tuir estatutu Partidu FRETILIN nia antes nee husi tinan 2022 ba kotuk nee Prezidente Partidu mak sei sai hanesan kandidatu ba Prezidente Republika.
Maibe iha tinan 2022 nee liu husi kongresu ami altera tiha klazula ida nee hodi deside katak kandidatu Prezidente Republika nee sei deside liu husi reuniaun komite Sentral FRETILIN.
Tan nee FRETILIN sei deside ninia kandidatu iha fulan Julhu hodi prepara kompete iha eleisaun Prezidensial periodu tinan 2027-2032.
“Maibe hafoin halo tiha alterasaun ba estatutu partidu nia, entaun kandidatu FRETILIN nia ba eleisaun prezidensial nee sei deside liu husi reuniaun Komite Sentral FRETILIN probavelmente sei akontese iha fulan Julhu se lae Agostu,” hatete nia ba jornalista sira liu husi telefone, Kuarta (10/06/2026).
Nia hatutan, membru Komite Sentral FRETILIN bele iha ona preferensia ba sira nia kandidatu maibe atu deside nee tenki liu husi reuniaun Komite Sentral FRETILIN.
“Hanesan naturalmente kuadru ida-idak ka membru Komite Sentral bele iha ona hanoin ruma maibe desizaun partidu nia nee sei foti husi reuniaun Komite Sentral nia rasik,” tenik nia.
Nia mos akresenta liu tan katak, oras nee Partidu FRETILIN finaliza ona reorganizasaun mandatu ba estrutura sira iha baze no oras nee hein deit atu halo reorganizasaun estrutura iha subnasional.
“Estrutura Postu Administrativu sira nee hotu ona, no hahu semana kotuk iha loron 6 no 7 nee ami tama ona ba konferensia munisipiu sira no tuir planu sei remata iha fulan Julhu, maibe se la konsege entaun sei too fulan Agostu molok foti desizaun liu husi reuniaun Komite Sentral FRETILIN nian hodi prepara ba eleisaun Prezidensial no eleisaun parlamentar,” nia argumenta.
Entretantu Antes nee Konselheiru Masimu Partidu (KHUNTO), José Naimori dos Santos “Bucar” hatete, Partidu KHUNTO deside ona atu kandidata Prezidente Partidu KHUNTO, Armanda Berta iha Eleisaun Prezidensial periodu 2027-2032.
(alb)
