DILI, STLTIMORLESTE.com – Prezidente Republika (PR), Jose Ramos Horta husu eleitores sira iha suku no munisipiu bainhira tuir eleisaun poder lokal husu vota ba feto.
Prezidente Republika Jose Ramos Horta hatoo kestaun nee ba jornalista sira iha Hotel Timor, Kuarta (10/06/2026) husu sidadaun sira bainhira akontese eleisaun poder lokal neebe sei mai, husu diak liu vota ba feto, tanba feto iha kapasidade no hatene klean konaba saida mak populasaun presiza.
“Hau haree ita nia esperiensia iha Timor Leste feto sira mak badinas liu, feto sira mak vitima liu, feto sira mak sempre todan liu iha uma, iha aldeia, diak liu hau husu ba eleitor buka hili mak kandidatu feto, hau hatete ba Governu ba instituisaun hotu hotu tau feto ba kandidatu labele maioria mak mane,” dehan PR Horta.
Xefe Estadu hatete, daudaun nee feto asumi kargu nuudar Xefe Suku, Xefe Aldeia sei menus tebes kompara ho mane, tanba nee iha eleisaun poder lokal mai husu vota ba feto sira hodi kaer poder lokal.
“Pelumenus 50% feto, agora daudaun Xefe Suku feto ida ka rua deit iha Timor Leste, Xefe barak diak tebes, ema sira nee servisu diak iha sira nia suku sira nia aldeia, maibe feto sira mak halo sakrifisiu liu, sira mak hatene hatudu domin ba unidade no domin ba labarik sira, domin ba sira nia difikuldade, nee duni ita nia demokrasia tun too aldeia tenke tane mai husi feto nee mak hau nia pozisaun,” dehan PR Horta.
Karik iha eleisaun Prezidensial feto kandidata aan, Prezidente Republika apoiu ka lae? Hatan ba kestaun nee Prezidente Republika hatete, bainhira nia la kandidata aan ba Prezidente Republika mak sei haree hodi deside laos haree ba feto maibe haree ba ema neebe iha duni kapasidade.
“Hau seidauk deside, se hau atu kandidata aan ka lae? Se hau la kandidatu aan karik hau sei haree sukat kandidatu ida neebe mak diak liu, feto neebe mak diak liu ka mane laos deit tanba kandidatu ida nia hatais vistidu entaun hau vota ba nia lae, nia bele hatais vistidu bele hatais kalsa, hau haree ida neebe diak ida neebe hatene servisu ho Governu hatene serbisu ho komunidade internasional, laos eleitu tiha prezidente depois sai fali opozisaun ba Governu hanesan uluk akontese,” hakotu PR Horta.
(eme)
