DILI, STLTIMORLESTE.com – Prezidente Republika (PR), Jose Ramos Horta defende projetu istoriku konstrusaun roo ahi husi Japaun atu transforma ekonomia Timor Leste.
Prezidente Republika, Jose Ramos Horta louva marku istoriku ida ba setor industrial Timor Leste nian durante serimonia simu traballador foun timoroan sira neebe tama iha kompania Tsuneishi Timor Shipbuilding iha Hotel Timor, Kuarta (10/06/2026).
Hahu husi Prezidente nia dialogu diplomatiku estratejiku ho ofisial Japaun sira, vizaun neebe uluk simples deit ba manutensaun roo lokal, agora dezenvolve an sai sentru boot internasional ba konstrusaun ro nian. Hodi hahi kompania Japaun neebe konesidu iha mundu ba sira-nia investimentu transformador nee, Xefe Estadu promete atu atua nuudar embaixador global ba estaleiru nee, hodi kompromete atu promove rasik ro sira neebe halo iha Timor ba komprador internasional sira iha Mediu Oriente, Afrika no Amerika Latina durante ninia misaun diplomatika sira tuir mai.
“Hodi destaka nesesidade urjente atu mantein investimentu estranjeiru neebe monumental tebes nee, Prezidente fo orientasaun makaas ba governu atu elimina obstakulu burokratiku sira no aselera reforma ekonomika,” dehan PR husi diskursu.
Prezidente Ramos Horta husu makaas ba Ministeriu Finansas no instituisaun Estadu relevante sira atu implementa lalais insentivu fiskal ba tinan 10 too 15 no finaliza infraestrutura apoiu sira neebe kruzial, liuliu projetu enerjia solar Laleia nian.
Prezidente Ramos Horta sublina katak, fornese enerjia renovavel ho folin baratu no estabelese polítika ekonomika neebe kompetitiva mak importante tebes atu garante viabilidade komersial estaleiru nian no asegura rihun ba rihun empregu ho kualidade aas ba povu Timor-oan.
Koalia ba sidadaun foinsae sira neebe prepara an ba formasaun avansadu iha Japaun, Prezidente Ramos-Horta fo hanoin ba sira katak sira-nia dixiplina, servisu makaas, no respeitu ba rai ospedeiru nia kultura sei halo sira sai embaixador diak (goodwill ambassadors) neebe vital ba nasaun.
Xefe Estadu destaka kbiit ekonomiku makaas husi timoroan sira neebe servisu iha rai-liur, hodi nota katak sira-nia remesa osan neebe haruka mai ho total liu millaun US$ 200 iha tinan kotuk, fornese lina moris neebe direita no efetivu liu ba família lokal sira duke ajuda internasional tradisional sira.
Prezidente reafirma ninia kompromisu neebe inabalavel firme atu haluan parseria laboral no industrial internasional sira nee, hodi haree ida-nee nuudar fatuk inan ba reziliensia no prosperidade ekonomika Timor-Leste nian iha futuru.
(eme)
