DILI, STLTIMORLESTE.com – Ohin loron 11 fulan Junhu tinan 2026, Kopa Mundial FIFA 2026 neebe organiza hamutuk husi nasaun tolu iha Amerika Norte hanesan Estadus Unidus Amerika, Canada no México hahu ona, hodi lori sentidu entuziasmu neebe boot tebes iha Timor Leste. Tanba iha Díli no Munisipiu sira prezensa bandeira Portugal domina fatin fatin, hodi sai hanesan testamunha ba apresiasaun futebol husi komunidade lokal, neebe ho fiar boot buka atu sosa bandeira nasaun nee nian ba uza.
Observasaun jornalista STL iha terrenu hatudu katak, vendador ambulante sira aproveita momentu nee hodi faan bandeira hanesan Portuga ho Argentina neebe sai alvu liu husi adeptu fotebol sira. Atividade faan bandeira nee mos sai nuudar oportunidade ekonomia kiik ida ba estudante sira atu hetan rendimentu liu tan.
Maski bandeira husi nasaun sira seluk faan barak iha dalan ninin no loja sira iha kapital, maibe dadus iha terrenu hatudu katak adeptu futebol iha Timor Leste kontinua sosa liu bandeira Portugal. Opsaun ida nee refleta ligasaun emosional neebe metin entre adeptu sira iha rai laran ho ekipa Nasional Portugal nian.
Iha kapital Díli, tranzitu loron-loron sai furak ho motorizada no kareta sira neebe kesi bandeira, hodi kria sentidu fraternidade entre sidadaun sira neebe hadomi desportu. Iha Same, Ainaro, Maliana, Likisa no seluk tan komunidade sira hatudu fiar katak Kopa Mundial FIFA 2026 bele lori dame ba povu tomak.
Nunee Governu Timor-Leste, liu husi Sekretariu Estadu Komunikasaun Sosial (SEKOMS) hamutuk ho Federasaun Fotebol Timor-Leste (FFTL) no ETO Telko, prepara ona transmisaun direitu ba jogu sira. Kooperasaun nee fasilita populasaun atu asiste jogu sira liu husi kanal RTTL no plataforma streaming ETO Telko nian.
Maibe tuir informasaun neebe iha Governu sei prepara fatin estratejiku sira iha Díli, hanesan Palasiu Prezidensial, no Sentru Konvensaun Díli, atu komunidade sira bele halibur no haree jogu hamutuk. Inisiativa nee hanesan parte ida husi hosi esforsu, hodi kria ambiente diskusaun neebe saudavel entre joven sira.
Tanba eventu futebol nee sai hanesan oportunidade diak, atu foti lisaun moral husi atleta sira neebe hatudu dedikasaun boot iha mundu.
Maski jogador sira hanesan Messi no Cristiano Ronaldo besik ona atu remata sira nia kareira, adeptu sira iha Timor-Leste sei mantein entuziasmu atu haree sira nia jogu ikus sira. Ida nee hatudu katak futebol iha Timor-Leste laos deit espetakulu, maibe mos sentidu unidade ida neebe boot tebes.
Liu husi entrevista, Adaptu Manuel da Silva hatete katak, nia sente kontente tebes tanba bele akompanha, kompetisaun boot ida nee hamutuk ho familia no belun sira.” Hau sente kontente tanba Kopa Mundial 2026, bele lori haksolok mai ita hotu,” hatete Manuel ba STL, Kinta nee (11/06/2026).
Nia espera katak ekipa neebe apoiu bele too iha final, no nia mos aproveita tempu hodi hametin liutan relasaun sosial, ho vizinu sira liuhusi haree jogu hamutuk.
Entretantu kompetisaun Kopa Mundial FIFA tinan nee sai istoriku tebes, tanba hanesan edisaun dahuluk neebe nasaun hamutuk 48, mak sei kompete hodi buka titlu kanpiaun mundial.
(car)
