BAUCAU, STLTIMORLESTE.com – Atualidade foos importadu kilograma 25 iha Suku Ossohuna, Postu Administrativu Baguia, Munisipiu Baucau, kada saka folin US$ 25.00 no supermi kaixa ida folin US$ 10.00, tanba kauza kondisaun estrada kotu iha Basarauai, Suku Hae-Coni, Baguia.
Xefe Suku Ossohuna Paulo dos Reis Piedade aprezenta, relasiona udan boot neebe akontese iha fulan Maiu tinan nee, rezulta estrada ligasaun husi Baguia Vila ba Suku tolu hanesan Hae-Coni, Ossohuna no Afaloicai kotu total iha area Basarauai Suku Hae-Coni. Kondisaun nee provoka folin nesesidade baziku hanesan fos importadu no seluk tan atual faan iha Suku Ossohuna sae makaas.
“Kondisaun estrada neebe mak aat folin nesesidade bazika hanesan foos sae ba US$ 25, supermi sae ba US$ 10 mina tein litru 2 sae ba US$ 4,” hateten Paulo ba jornalista sira iha Vila Nova Baucau, Kinta (11/06/2026).
Nia esplika, folin nesesidade bazika hirak nee, hanesan foos kada saka Kg 25 antes nee folin US$ 14.00 aumenta ba US$ 25.00, supermi sedaap antes nee US$ 7.00 kada kaixa folin aumeta ba US$ 10.00 no mina tein litru 2 US$ 3.00 aumenta folin ba US$ 4.00.
Nia sublina, folin nesesidade bazika nee afeta tebes komunidade sira neebe menus rendimentu, tanba komunidade sira iha Suku refere maioria vida agrikultura liu husi faan produtu lokal sira hafoin hetan rendimentu natoon sosa produtu importadu hirak nee hodi konsumu, maibe kondisaun estrada aat no kotu komunidade agrikultores sira labele lori sai produtu lokal ba merkadu no folin nesesidade bazika neebe faan iha kios sira iha Suku refere aumenta, tanba emprezariu sira neebe antes nee ho kareta ba faan sasan nesesidade baziku iha area refere laiha ona, iha neebe kauza husu estrada refere.
Kondisaun nee estrada nee, parte ekipa Ministeriu Obras Publikas too ona terrenu haree kondisaoens sira inklui halo levantamentu, iha neebe objetivu atu konstrui ponte iha parte neebe kotu nunee bele fasilita fali transporte publiku no emprezariu sira lori sasan nesesidade bazika ba faan iha Suku Ossohuna hodi neutraliza folin nesesidade bazika atual iha Suku refere.
“Akontesimentu estrada Basarauai aat sira husi diresaun obras publikas sira halo ona levantamentu dadus, maibe ami seidauk rona informasaun klaru,” Paulo konta.
Iha fatin hanesan, Xefe Suku Hae-Coni, Luis de Oliveira husu Ministeriu Obras Publikas aselera prosesu sira ba implementasaun konstrusaun ponte iha Basarauai, tanba atual Autoridade Suku no Postu simu presaun husi komunidade.
“Nuudar Autoridade agora ami iha neeba simu presaun husi komunidade, tanba sira asesu ba merkadu la diak folin sasan sae, entaun ita hakarak aselera lalais prosesu sira nee,” Luis komenta.
Nia relata, estrada neebe kotu iha Basarauai antes nee iha mota kiin ida nia luan la too metru 10, maibe kauza husi udan boot rezulta mota refere kotu ho luan metru 10 resin. Atual komunidade sira utiliza material lokal hanesan au halo ponte provizoriu hodi fasilita movimentu estudante lao ain sira no seluk tan enkuantu transporte privadu hanesan motor labele liu.
Liga asuntu nee STL seidauk hetan komfirmasaun husi Koordenador Tekniku Destakadu Obras Publikas Munisipiu Baucau, maibe antes nee hateten, ekipa halo ona levantamentu topografia importante, identifika kondisaun rai no karakteristika area estrada nian antes Governu deside modelu konstrusaun neebe apropriadu atu garante durabilidade infraestrutura refere.
Entretantu estrada diresaun husi Baguia Vila ba Suku Afaloicai hamutuk kilometru 10 resin fo asesu ba populasaun husi Suku 4 hamutuk nain 7.745 kompostu Suku Afaloicai ho populasaun hamutuk nain 1.639, Alawa Kraik nain 1.934, Hae-Coni nain 2.807 no Ossohuna iha populasaun hamutuk nain 1.365.
(tom)
