DILI, STLTIMORLESTE.com – Iha loron hirak nee nia laran merenda eskolar iha EBF 12 de Outubro antes nee lao diak, derepente laiha ka paradu, halo estudante balun fila uma triste hodi dehan bá inan aman sira merenda laiha halo sira hamlaha los.
Tuir informasaun neebe STL asesu Kinta nee (11/06/2026), iha loron hirak nia laran hahu iha Sesta kedas alunus sira la merenda iha eskola hanesan baibain, halo estudante balun fila uma ho kondisaun hamlaha tanba sai husi uma inan aman balun la fo osan han nian. Haree ida nee halo inan aman balun mos triste no laran susar, tanba bainhira merenda eskolar lao sira la presiza fo osan bá oan sira hodi sosa sasan, tanba labarik balun sosa han fila uma kabun moras no mear.
Estudante EBF 12 de Outubro, Joaquin Goncalves husi kuatru ano hatete, nia ho kolega sira triste bainhira merenda eskolar laiha, tanba toman han tiha mak laiha nee senti laran susar. Baibain rekreu mak merenda eskola nee han bosu didiak too eskola sai fila bá uma, agora merenda laiha nee, sei eskola mos senti hamlaha tiha ona. Neebe bainhira too uma, hamlaha halo sira kosar sai. Inan aman sira fo osan, sira sosa iha ema sira neebe faan iha area eskola nian, maibe dala ruma han too uma halo sira senti kabun moras no mear.
“Loron hirak merenda laiha nee hau bá eskola, rekreu hau ho kolega sira mai sosa deit sasan sira neebe ema faan besik iha eskola. Ami han tiha too uma dala ruma halo ami nia kabun moras ou se lae mear,” dehan nia.
Nia hatutan, hakarak lalais merenda eskolar lao fali hanesan baibain para sira labele lori osan mai eskola, husik inan aman fo deit osan sae mikrolet nian.
Inan Estudante Domitilia Bareto katak, loron hirak nee merenda eskolar laiha neebe halo labarik sira sai bá sosa deit hahan sira neebe mak faan besik iha eskola nee. Merenda nee la lao tanba dehan osan mak hotu, maibe seidauk hatene los, nee so eskola mak bele esplika. Espera merenda eskolar lao fali ona para labarik sira mai lalika gasta osan.
“Hau mai hein hau nia oan too sai eskola mak fila uma, neebe hau haree labarik sira la han hanesan babain. Nee mak tenke lori fali sira bá sosa sasan oan sira neebe fan iha liur nee hodi fo bá sira,” dehan nia.
Nia katak, espera merenda nee lao fali ona para labarik sira labele gasta osan bá han nia.
Hatan bá kestaun nee Koordenador EBF 12 de Outubro Tasi-Tolu, Fernando Barreto dehan, los duni merenda eskolar loron hira nia laran nee laiha tiha, tanba informasaun mai husi sentru nian katak orsamentu bá segundu trimestral nian mak seidauk foti, tanba osan primeiru trimestrial nian hotu ona. Neebe bainhira orsamentu bá segundu trimestral nian foti ona, eskola sei implementa tuir orientasaun husi sentru katak implementa fali, entaun eskola mos halao fali, atu nunee estudante bele han fali ona. Neebe espera semana oin mai nee bele lao fali ona.
(dom)
