DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida ho inisial JC, tanba komete krime hasoru lezada inisial LMP.
Iha indisus katak, baibain lezada LMP para nia kareta ho marka Toyota RUSH TRDD ho numeru matrikula A. 24-647 TL iha lezada nia uma oin neebe mak lokaliza iha Bairu Delta III, Aldeia Fomentu 3, Suku Comoro, Postu Administrativu Dom Aleixo, Munisipiu Dili.
Iha fulan Maiu tinan 2022 haleu tuku 20H00, identifika katak arguida JC uza motorizada ida ho marka Beat, xapa matrikula lezada la verifika, halo movimentu ba mai dala tolu liu husi lezada nia uma oin hodi obeserva kareta referidu.
Ho nunee iha kalan nee kedas, iha oras la apuradu arguida konkretiza duni nia planu ida, hodi sunu estraga tiha lezada nia kareta ho kondisaun neebe mak aprezenta ona iha dokumentus.
Lezada rasik foin identifika kareta hetan sunu iha loron 10 fulan Maiu tinan 2022, iha tuku 7H30 dader, altura neeba lezada ho nia subrinhu Andre Augusto Pinto mak loke kareta nia odamatan hodi haree kareta nia kondisaun.
lezada nia kareta nee hetan sunu iha parte kotuk, kapon leten, AC, odamatan parte laran no kotuk, odamatan oin parte karuk no loos, sintu kareta nia no fatin tau dokumentus kareta nia.
Konsekuensia direita nesesariu husi hahalok arguida nia halo lezada LMP sofre prejuizu ho total US$ 2,650.00.
Arguida nee halao livre ho intensaun hanoin rasik, arguida aproveita lezada ho nia familia sira toba dukur hotu mak arguida pratika nia aktu nee, arguida mos hatene katak sunu estraga lezada nia kareta iha lezada nia uma oin nee fo prejuizu signifikativu ba lezada no hahalok nee kontra lezada nia vontade no kontra lei.
Arguida mos hatene katak nia hahalok nee proibidu no punidu tuir lei, ho Pena ho hahalok sira nee konstitui arguida.
Arguida JC nuudar autor material ho forma konsumadu ba krime ida Insendiu no punidu iha artigu 263⁰ husi kodigu penal nian.
Hatan ba akuzasaun nee, arguida konfesa ba Tribunal katak, faktus sira neebe mak Ministeriu Publiku akuza ba arguida nee loos hotu, tanba iha momentu neeba kareta nee arguida nia laen nia, maibe lezada balik nama tiha no kareta nee lezada nian fali.
Arguida dehan, arguida ba sunu Kareta nee uza gas mak sunu, too ahi nee mate rasik.
No osan sira hamutuk rihun 2 nee arguida nia kuinada dehan lalika selu, tanba arguida ho lezada dame malu ona.
Arguida deklara, daudaun nee lezada laos iha Timor, maibe ba halao servisu iha Inglatera.
Rona tiha deklarasaun, Tribunal deside hodi tama ba alegasaun Ministeriu Publiku no parte Defeza nia.
Ministeriu Publiku liu husi alegasaun husu Tribunal atu aplika pena adekuadu ba arguida, atu nunee iha futuru labele akontese tan hanesan nee.
No parte Defeza ba arguida, husu Tribunal atu fo kastigu kmaan ba arguida atu labele viola nia liberdade.
Hafoin rona tiha alegasaun, Tribunal deside muda ba loron seluk hodi rona desizaun ikus.
Audensia Julgamentu nee prezide husi Juiz koletiva, Fransisca Cabral no estajiariu nain rua, Ministeriu Publiku reprezenta husi Prokurador Aderito Tillman, no arguidu hetan asistensia legal husi Defensor Publiku, José Guterres.
(ter)
