DILI, STLTIMORLESTE.com – Folin foos importasaun kontinua sae aas iha area rural, maski Ministeriu Komersiu no Industria (MKI) hatoo katak loja boot no distributor sira iha Dili mantein presu neebe normal.
Diferensia presu entre foho no sidade nee mosu tanba kestaun lojistika, distansia, kondisaun estrada neebe aat no kbiit negosiante sira nian iha baze.
Tuir analiza husi Observador Ekonomia, José Xavier katak, transportasaun husi Portu Tibar ka Dili ba munisipiu sira seluk gasta kustu ka osan neebe boot.
“Ita hotu hatene katak folin foos sae iha foho, tanba kustu transporte neebe karun liu, nunee ita presiza lojistika neebe diak hodi labele fo todan ba povu,” dehan José ba STL, Kinta nee (11/06/2026).
Nia dehan, kondisaun estrada rural neebe ladun diak aumenta mos tempu viajen no kustu manutensaun kareta nian, hodi rezulta folin foos kada saku neebe komunidade rural sira sosa sae aas liu fali presu husi sidade.
Aleinde nee menus mos kompetisaun entre negosiante sira iha suku izoladu sira, nunee hamosu situasaun neebe loja kiik deit mak domina no foti desizaun ba presu, hodi kria susar boot ba família sira neebe depende deit ba subsidiu husi Governu .
Iha parte ketak, Akademista UNPAZ, Manuel de Araújo hatete, monitorizasaun lo-loos iha merkadu rurais mos sai save importante. Tuir nia, Governu laos deit garante stok liu husi Sentru Lojistika Nasional (CLN), maibe tenke kria mos ekipa konjunta hodi foti asaun no duni tuir se-se deit mak foti oportunidade hodi hasae folin foos tuir sira nia hakarak iha baze, hodi nunee labele kria krizi foun ba kbiit laek sira.
(car)
