DILI, STLTIMORLESTE.com – Movimentu kareta boot sira neebe tula material no karga nakonu hodi tula ba armajen no ba Munisipiu sira, laos deit lori faktu lojistika, maibe mos komesa fo fali impaktu la diak no prezudika transporte sira seluk neebe uza estrada publiku iha kapital laran.
Tuir observasaun jornalista STL iha terrenu haree katak, kareta boot sira neebe halai hodi uza fali oras loron, hodi transporte sasan karga nian sira nee, halo movimentu trafegu sai nakdoko no buka dalan susar. Kareta kiik no mos motorista sira tenke foti fali risku boot nee, neebe mos hamosu ameasa boot ba seguransa tanba espasu estrada neebe klot.
Kareta boot neebe nakonu ho karga boot baibain lao neneik no presiza espasu boot hodi frequenta, buat neebe obriga transporte kiik sira atu para ka tesi netik dalan no risku boot. Prezensa transporte pezadu sira nee halo sidade laran sai fali engrafamentu trafegu block, liu liu iha oras neebe movimentu publiku nian aas.
Dalan prinsipal neebe lori karga ba armajen, no munisipiu mos tenke fahe ba povu baibain nia transporte. Situasaun nee presiza atensaun no regulamentu husi Ministeriu relevante sira, liu liu konaba define oras loloos ba kareta boot sira nee hodi labele fo fali prejuizu, ba fali transporte publiku no privadu sira seluk neebe buka moris iha tempu loron.
Sidadaun sira neebe loron loron uza kruzamentu prinsipal nee komesa hatudu sira nia preokupasaun boot konaba perigu neebe bele mosu iha dalan publiku. Komunidade balu sente katak operador kareta boot sira nee dá-la ruma la uza kbiit ho kuidadu, hodi uza deit fali forsa husi transporte boot nee hodi domina hosi sorin ba sorin, la hanoin ba transporte kiik.
“Ami neebe lori veikulu roda rua nee mak senti tauk, tanba kareta boot sira nee kuandu halai iha tempu loron, sira la fo fali prioridade ba ami transporte kiik sira. Sira manobra deit lakohi hatene katak ami iha sira nia sorin, buat nee lori fali risku boot tebes ba ami nia moris,”dehan José Soares, nuudar motorista ida neebe uza dalan nee loron loron ba STL, Sesta nee (12/06/2026).
Aleinde seguransa sidadaun nee mos kestiona konaba oras operasaun nian, neebe ladiak hodi hamosu engrafamentu naruk. Tuir nia hanoin, Governu tenke estabelese regulamentu hodi labele fo fali prejuizu ba interese publiku neebe boot liu tan.
“Iha rai seluk, kareta boot sira hanesan nee bele halai deit iha kalan ka oras neebe ema la lao barak, maibe iha Dili sira halai iha loron boot hodi halo trafegu netik hodi no prezudika fali ami neebe atu ba servisu lalais,” dehan nian.
(car)
