DILI, STLTIMORLESTE.com – Prokurador Jeral Republika (PJR) deklara katak, prosesu barak mak delega ba iha Polisia Seintifiku Investigasaun Kriminal (PSIK), hodi kontinua halao investigasaun.
“Ita haree prosesu barak agora delega ba iha Polisia Sientifiku Investigasaun Kriminal (PSIK),” dehan PJR, Nelson de Carvalho ba jornalista sira, depois de halo lansamentu ba revista Ministeriu Publiku iha Kolmera, Sesta (12/06/2026).
Tuir PJR, prosesu sira neebe avoka husi KAK, balu iha Prokurador titular mak halo investigasaun, no konaba razaun saida mak PJR la delega ba iha KAK, PJR lakohi fo komentariu.
“Razaun buat ida, neebe iha razaun hau labele fo sai tanba saida, ita boot sira haree iha komentariu oituan, husi sira rasik mos halo komentariu, sira mak halo razaun ba hau buat ida la iha,” dehan PJR.
Nia esplika, komunikasaun entre Prokurador Jeral Republika no Komisariu KAK lao diak hela, tanba iha loron 20 Maiu neebe selebra ona, PJR koalia hela ho Komisariu KAK. Tanba nee konaba prosesu neebe avoka ona atu haruka fali ba KAK sei haree lai.
Konfirma kona-ba prosesu roo Haksolok, PJR dehan investigasaun lao hela.
“Hau promete ba ita boot sira sei la too preskreve, husi roo Haksolok nee mosu tan krime neebe iha laran hotu, roo Haksolok hanesa aihun boot ida nia abut barak los, tanba nee sei iha prosesu investigasaun,” dehan nia.
Iha fatin ketak, Akademiku UNTL, Rafael de Jesus dehan, Ministeriu Publiku hanesan nain ba iha prosesu, tanba nee atu distribui prosesu neebe iha kabe ba iha PJR.
“Sira hanesan nain ba iha prosesu, atu distribui prosesu kabe ba iha sira tanba lei mak hateten,” dehan nia.
Nia hatutan, ba oin presiza kooperasaun diak entre KAK no MP atu servisu hamutuk kombate krime korupsaun.
(ter)
