DILI, STLTIMORLESTE.com – Prezidente Republika (PR), Jose Ramos Horta preokupa ho verifikasaun no aprovasaun ka validasaun ba dadus rejistu husi frente externa ninia, tanba nee bolu Ministru Asuntu Kombambates Libertasaun Nasional (MKLAN), Gil da Costa Monteiro “Oan Soru” hodi esplika klaru.
Bainhira remata enkontru, Ministru Asuntu Kombambates Libertasaun Nasional (MKLAN), Gil da Costa Monteiro “Oan Soru” ba jornalista iha Palasiu Prezidensial Nicolau Lobato Bairru Pite Sesta (12/06/2026) hatete, ohin mai halo enkontru ho Prezidente tanba Prezidente Republika preokupa ho verifikasaun validasaun ba dadus rejistu husi frente externa tanba nee konvida sira mai hodi halo esplikasaun.
Ministru hatete, Prezidente Republika konvida sira mai ho Prezidente Administrasaun CCLN, Vise Prezidente Administrasaun CCLN, konvida mos ho Sekretariu Estadu maibe tanba partisipa iha jornada orsamentu tanba nee la partisipa.
“Prezidente Republika iha preokupasaun ruma relasaun ho verifikasaun no aprovasaun ka validasaun ba dadus rejistu husi frente externa Ninia. Entaun nia konvida ami mai atu fo informasaun ruma ba Prezidente Republika tanba iha ema balun mos hatama reklamasaun, balun hatama kontentasaun entaun Prezidente Republika duvida ho ida nee, neebe nia fo avizu ida liu husi Gabinete, ohin ami mai hasoru Prezidente Republika ita bele fo esplikasaun loloos ba Prezidente Republika,” dehan Ministru.
Emprinsipiu publiku hatene tanba frente externa Ministru sempre koalia bebeik konaba direitu a pensão ho dedikasaun eskluziva.
Liafuan dedikasaun eskluziva nee dehan, laiha servisu ruma hodi hetan remonerasaun husi estadu ka la eskola, nia nee atu prienxe rekezitu ida dedikasaun eskluziva nee.
“Pur ezemplu iha rai laran ita koalia konaba baze apoia iha ailaran, baze guerilla iha ailaran, destera ba Atauro ka ba fatin seluk, ka deteinsaun sira neebe militar Indonezia halo durante tinan sira nia laran iha okupasaun Indonezia nia tempu, entaun nee signifika detein sira nee iha tempu hotu-hotu, nia labele halo servisu ruma ba ninia moris, nia labele partisipa atividade neebe hetan remonerasaun ida nee mak prienxe kriteriu dedikasaun eskluziva,” katak nia.
Tanba nee iha lamentasaun sira neebe agora daudauk iha, hodi provoka preokupasaun husi Prezidente Republika ninian, tanba mosu dokumentu neebe iha MKLAN nee koalia kona-ba dedikasaun eskluziva.
Foin lalais Ministru Asuntu Kombatentes Libertasaun Nasional (MAKLN), hamutuk Segundu Vise Prezidente Conselho dos Combatentes da Libertação Nacional (CCLN), Mario Nicolau dos Reis, Diretor Nasional ba Pensaun no Subvensoens (DNPS), Manuel dos Santos Araujo, inklui Asesor Polítiku, Jacinto Vicente Viegas “Roke”, halo akompanamentu ba ekipa sira Frente-Externa nian neebe halo validasaun ba dadus diplomata Timoroan sira neebe rejistadu atu hetan títilu hanesan Kombatentes Libertasaun Nasional, tanba sira nia kontribuisaun durante luta libertasaun nasional iha Diaspora, tuir terrefas no misaun sira neebe orientadu hosi Comandante em Chefe das FALINTIL hanesan, Saudozu Nicolau dos Reis Lobato ho Kay Rala Xanana Gusmão.
Prosesu validasaun ba dadus Frente-Externa neebe halao durante loron rua, hosi 01 too 02 Junhu 2026, iha Salão Três de Março Maubai nee, konsege valida dadus Diplomata hamutuk nain-118 mak validadu atu hetan títulu nuudar Kombatentes no rekonesimentu hosi Estadu.
(eme)
