DILI, STLTIMORLESTE.com – Partidu Politika (ParPol) sira foti hakat makaas iha loron Sabadu no Domingu hodi halao fali sira nia movimentu konsolidasaun hodi ba “Buka Domin” ka votu iha baze munisipiu sira, maski observador poitika no akademista sira kritika katak, movimentu ho hakat silensiu nee hanesan estratejia provizoriu deit hodi nunee labele lakon baze eleitoral.
Observador Politika, Luciano Freitas nota katak, foti asaun tun ba foho no kria atividade hametin kbiit eleitoral iha munisipiu sira laos buat foun, maibe sai ritmu regular bainhira tempu eleisaun nian besik ka interese poder nian mosu.
“Ita labele husik deit pratika politika sira hanesan nee lao bebeik la ho baze fundamentu ka la kestiona. Se ita hili deit atu nonook, partidu sira sei uza nafatin ita nia prezensa iha baze nuudar intrumentu hodi sukat deit sira nia forsa poltika, laos lori solusaun neebe loloos,”dehan Luciano ba STL, Segunda nee (15/06/2026).
Iha dezenvolvimentu sistema demokrasia nian, Luciano foti kestaun konaba domin neebe partidu politika sira hatudu iha fin de semana nuudar fali domin tempu eleisaun nian ba apoiu povu nian deit, tanba bainhira povu nia lian presiza duni, partidu sira mosu ho lian mamar maibe kadeira poder nian hetan ona povu nia moris iha area rural sira dala barak kria fali distansia.
Aktividade sira nee maski uza fali maskara konsolidasaun interna, maibe tuir loloos nuudar kampanha antisipada hodi sukat forsa no hametin influensia nunee labele lakon baze lori ba oin, maski finalmente povu la presiza deit diskursu sosiopolitiku iha loron Sabadu no Domingu, maibe komunidade iha baze presiza loloos dezenvolvimentu neebe sustentavel hanesan estraada, bee moos no kualidade moris, laos deit festa politika neebe mai ho frekuensia uituan deit hodi rona promesa.
Tanba aktividade hametin kbiit iha loron Sabadu no Domingu nee hatudu momoos katak, partidu hotu hotu komesa hit an hodi prepara an ba dezafiu politika sira neebe mai oin. Observador Politika nee nafatin fo hanoin katak, konsolidasaun neebe loloos mak oinsa lori solusaun ba povu nia terus, laos deit lori festa ba baze.
Iha parte ketak, Akademista UNPAZ, Casemiro Gonçalves hatete, politika konsolidasaun nee diak ba demokrasia, maibe povu mos labele sai deit hanesan intrumentu ba numeru deit.” Ita resiza kritika no sukat mos rezultadu husi promesa sira neebe uluk fo ona, hodi nunee bele foti desizaun neebe matenek no labele monu fali ho promesa mamuk neebe partidu sira lori tun ba baze,” dehan nia.
(car)
