DILI, STLTIMORLESTE.com – Primeiru Ministru (PM), Kay Rala Xanana Gusmão ohin halao viajen ofisial ba Rusia atu partisipa iha Summit ASEAN–Rusia 2026 neebe sei realiza iha Kazan durante loron tolu, hahu husi 17 too 19 Junhu 2026.
Iha eventu nee, PM Xanana sei hamutuk ho lider sira husi nasaun membru Association of Southeast Asian Nations no Prezidente Vladimir Putin atu diskute relasaun no kooperasaun entre ASEAN no Rusia.
“Summit ASEAN–Rusia konsidera nuudar plataforma importante atu hametin amizade, dialogu polítiku no kooperasaun ekonomika entre rejiaun Sudeste Azia no Rusia.
Iha enkontru nee, lider sira sei aborda asuntu importante sira hanesan seguransa rejional no global, investimentu no komersiu, enerjia, edukasaun, teknolojia, saude publika, konektividade, infraestrutura no troka kultura,” haktuir nota komunikadu imprensa neebe STL asesu husi media GPM, Segunda (15/06/2026).
Objetivu prinsipal husi summit nee atu reforsa relasaun diplomatika entre ASEAN no Rusia, promove kresimentu ekonomiku hamutuk no kontribui ba manutensaun paz no estabilidade iha rejiaun.
Ba Timor Leste, ASEAN kontinua sai plataforma estratejika atu hasae ekonomia, dezenvolve kapasidade nasional, hametin relasaun internasional no asegura dezenvolvimentu sustentavel. Maski Timor Leste kontinua integra-an iha atividade no diskusaun rejional sira ASEAN nian hanesan parte husi prosesu adezaun totál.
Durante summit nee sei realiza mos sesaun painel no meza-redonda sira neebe diskute parseria entre ASEAN no Eurasian Economic Union, inklui kriasaun espasu komersiu no investimentu komun, kuidadu saude, kooperasaun enerjia no industria, dezenvolvimentu dijital, inteligensia artificial (AI), seguransa ai-haan, no konektividade transporte no lojistika.
Integrasaun iha Eurasia sai mos tema importante iha forum nee. Prosesu nee involve esforsu nasaun sira iha Europa no Azia atu hametin kooperasaun ekonomia, polítika, seguransa no infraestrutura. Organizasaun sira hanesan Eurasian Economic Union, Shanghai Cooperation Organisation no Belt and Road Initiative konsidera nuudar ezemplu importante husi integrasaun rejional neebe promove komersiu, investimentu, konektividade no estabilidade.
Governu Timor Leste haree esperiensia integrasaun Eurasia nuudar referensia importante ba prosesu integrasaun rejional iha ASEAN, liu-liu atu reforsa kooperasaun ekonomika no dezenvolvimentu nasional.
(alb)
