DILI, STLTIMORLESTE.com – Maski tinan ba tinan Governu aloka orsamentu hodi kria programa ba protesaun labarik realidade iha terrenu hatudu katak, fenomenu labarik dalanan neebe faan sasan iha kruzamentu Komoro presiza atensaun husi Governu, liu liu iha kruzamentu besik Supermerkadu Leader ho Timor Plaza, Dili. Situasaun nee Kestiona tebes efikasidade husi Governu neebe seidauk foti medida integradu hodi salvaguarda labarik sira nia futuru.
Tuir observasaun jornalista STL iha terrenu hatudu katak, labarik sira nee uza duni espasu kruzamentu trafegu nian nuudar fatin prinsipal atu hein kareta no motor sira neebe para, ho objetivu atu husu ajuda ba motorista ka ema iha kareta laran sosa sira nia sasan.
Labarik balu aproveita baredas pembatas via publiku nian neebe ho koor metan, kinur no mutin nuudar fatin hodi tur no hein, maski fatin nee klot no fo ameasa boot ba sira nia seguransa fiziku.
Ho aten barani labarik sira nee hakat ba odamatan kareta no motor sira neebe para ka lao neineik, hodi halo kontaktu direita ho kondutor sira hodi oferese sira nia sasan.
Situasaun nee hamosu risku boot ba labarik sira nia integridade fiziku, tanba sira buka moris deit iha kareta boot no motor nia klaran, neebe bele Lori dezastre ba sira nia moris iha kualker minutu.
Labarik sira nee mos lao deit ho vistuariu neebe simples tebes, hanesan kalsaun badak, kamizola no balu uza deit xinelas neebe la fo protesaun fiziku ida neebe adekuadu iha via publiku.
Faktu ida mos hatudu katak kestaun nee laos deit ba labarik mane, maibe mos involve labarik feto sira neebe lao hamutuk iha area trafegu hodi buka rendimentu iha tempu dader, meudia, loraik no kalan.
Movimentu nee akontese duni iha area neebe movimentadu tebes no nakonu ho atividade ekonomia sidade nian, liu-liu besik edifisiu no supermerkadu boot sira neebe fo dezafiu boot ba monitorizasaun trafegu nian.
Realidade nee sai hanesan baze ida neebe hatudu katak kondisaun sosial no ekonomia familiar nian sei sai dezafiu boot, neebe obriga labarik sira atu labele goza sira nia direitu ba dezenvolvimentu no tempu labarik nian ho diak.
Tuir Akademista UNTL, Nelson da Silva katak, fenomenu labarik dalanan nee laos problema neebe haree deit iha leten, maibe tanba menus politika publika neebe rezolve too abut husi kiak estrutural.
“Ita husu ba Governu atu labele hatur deit programa neebe provizoriu, maibe presiza kria mekanizmu neebe foti kedan responsabilidade inan-aman nian ho apoiu ekonomia neebe sustentavel ba família vulneravel sira hodi bele salvaguarda labarik sira nia direitu ba futuru,” hatete Akademista nee ba STL, Segunda nee (15/06/2026).
Nia hatutan, Governu liu husi Ministeriu Solidariedade Sosial no Inkluzaun (MSSI ) hamutuk ho Polisia Nasional Timor Leste (PNTL) presiza halo koordenasaun luan hodi buka solusaun ba kestaun nee. Karik husi labarik sira moris iha arteira publika la ho kontrolu, sidade Díli labele hafok an husi potensial krime kiik no mos sei hamriik nuudar sidade neebe la amijavel ba labarik, maski Timor Leste ratifika ona Konvensaun Direitu Labarik nian.
(car)
