BAUCAU, STLTIMORLESTE.com – Kompanhia Nautetu Fatima Unipessoal Lda sei buka meus atu finaliza projetu reabilitasaun estrada iha area Samaguia, Suku Tequinomata, Postu Administrativu Laga, Munisipiu Baucau.
Diretora kompanhia Nautetu Fatima Unipessoal Lda, Maria Madalena dos Santos Fatima aprezenta, relasiona projetu reabilitasaun estrada iha area Samaguia, Suku Tequinomata, Postu Laga, Munisipiu Baucau, neebe Governu kontratu kompanhia halao servisu iha tinan 2023 no too ohin loron seidauk finaliza, laos kompanhia abandona servisu iha terrenu, maibe tuir kontratu neebe iha parte kompanhia kompleta ona servisu sira hanesan konstrusaun valeta, moru protesaun inklui box claver sira no planu atu kontinua ba servisu finaliza nian hanesan fui alkatraun been ho tipu makadam, maibe kompanhia seidauk implementa servisu refere, tanba kauza husi funu iha mediu oriente, neebe implika stock alkatraun been menus no folin sae, nunee kompanhia seidauk kompras atu finaliza servisu refere.
“Agora daudaun alkatraun been stok menus folin sae, nee laos ami kompanhia deit mak hakarak halo komentariu ida nee, maibe exelensia Ministru Obras Publikas mos hatene, material agora folin sae. Nee impaktu husi funu mediu oriente. Obra neebe ami kaer nia orsamentu la sufisiente ona ba ami atu esforsu aan atu aselera servisu,” hateten Maria Madalena ba STL, Segunda (15/06/2026).
Nia sublina, problema neebe atualmente kompanhia infrenta hanesan folin alkatraun been sae hodi implika ba servisu iha terrenu, nunee parte kompanhia relata ona ba Ministeriu Obras Publikas no Autoridade Suku atu konsidera mos kestaun refere, tanba prosesu fui alkatraun been ho tipu makadam neebe seidauk implementa impaktu husi stock alkatraun been menus no folin sae halo kompanhia dada iis atu kompras, tanba orsamentu neebe Governu preve ba projetu refere la sufisiente atu kobre.
Nia fundamenta, mezmu nunee parte kompanhia Nautetu Fatima buka ona meus liu husi koordenasaun ho kompanhia internasional balu atu apoiu servisu refere too finaliza.
“Liu liu iha Samaguia nee. Se karik kompanhia nee mak ami nia koordenasaun la tuir malu, entaun hau sei hahu fali dia 20 agora ba leten nee servisu fali ona. Tanba hau koordena ona hau nia trabalhador sira antes tau aspal sei hatama uluk stok britas halo tetuk estrada,” Madalena akresenta.
Nia deklara, liu husi koordenasaun ho kompanhia internasional ba apoiu projetu reabilitasaun estrada refere mezmu seidauk iha rezultadu pozitivu, maibe parte kompanhia Nautetu Fatima koordena ona nia trabalhador sira, tuir planu iha loron 20 Junhu nee sei hahu fila fali servisu iha terenu, halao servisu sira hanesan hamoos estrada ninin, halo tetuk rai inklui prepara fatuk britas numeru 35 no 23 hafoin buka meus aranja alkatraun been hodi implementa servisu fui alkatraun been ho tipu makadam ba finaliza nian.
Tanba nee husu Diresaun Tekniku Destakadu Obras Publikas Munisipiu Baucau no Autoridade Suku sira atu matein hametin kooperasaun diak no akompanha kompanhia hodi finaliza projetu refere ba interese publiku, nomos husu ba Ministeriu Obras Publikas fo atensaun ba kompanhia lokal sira neebe simu responsabilidade husi Governu iha tinan 2021 implementa projetu sira ba durasaun servisu tinan ida, maibe too ohin loron seidauk finaliza.
Aliende mos nia dehan, projetu seluk hanesan reabilitasaun estrada iha Suku Sagadate, Postu Administrativu Laga, Munisipiu Baucau neebe kompanhia Nautetu Fatima responsabiliza, daudaun servisu kontinua lao no tuir planu sei finaliza iha fulan Agostu tinan nee.
“Iha Sagadate Beliuali nee laos uza makadam maibe uza plam concrit agora daudaun servisu lao aseleradu loos hau bele garante entrega iha fulan Julhu ou inisiu Agosto,” Madalena komenta.
Entretantu, lista ofisial neebe STL asesu kona-ba projetu reabilitasaun estrada neebe implementa husi kompanhia refere, Governu liu husi Ministeriu Obras Publikas kontrata ba ba fatin rua. Mak hanesan projetu reabilitasaun estrada rural iha Suku Saudate, Postu Administrativu Laga, hamutuk Km 3.25 metrus ho valor orsamentu US$ 455.236,93. No fatin daruak reabilitasaun estrada iha area Samaguia, Suku Tequinomata, Postu Laga Km 2.15 meter ho valor orsamentu US$ 436,794.48.
Projetu rua refere reabilitasaun ho tipu cor beton no ateru inklui fui alkatraun been ho durasaun servisu tinan ida, iha neebe tuir kontratu neebe iha finaliza ona, maibe too ohin loron projetu fatin rua refere seidauk finaliza, tanba iha Suku Sagadate progresu fiziku foin atinji 50% resin no Samaguia foin atinji 30% resin.
(tom)
