DILI, STLTIMORLESTE.com – Tribunal Judisial Primeira Instansia Dili (TJPID) realiza julgamentu ba krime usuparsaun de imovel, neebe mak komete husi arguidu nain 2 hasoru lezadu nain 2 iha Munisipiu Ermera.
Iha indisiu sufisiente katak, ofendidu MC hamutuk ho nia alin BdS hola rai pedasuk ida neebe lokaliza iha area Retsuli, pertense ba aldeia Raimean, Suku Urahou, Hatolia B Ermera, neebe hetan eransa husi sira nia inan ho naran Lou Buti.
Ofendidu sira uza rai nee hodi halo toos no kuda ai-horis sira hanesan kafe modo-tahan, halo lutu, karau nia luhan inklui halo uma baraka.
Iha loron 18 fulan Abril tinan 2025, iha tuku 10:00 dader, vitima sira ba iha nia toos no haree katak uma neebe vitima sira harii nee sobu tiha ona, tanba sira sunu tiha ona, no ai-riin sira neebe halo husi ai no bambu sira rahun tiha ona.
Tuir mai.vitima sira hasoru arguidu.CGL no DGL iha toos laran, arguidu duni tuir ofendidu sira hakilar dehan rai nee laos imi nian, se mak halimar ho ami sei tesi nia ulun tara sae ba ai leten”.
Nune ofendidu sira sente tauk no la ku batar.
Antes nee arguidu DGL hetan kondenasaun tanba komete krime omisidiu. Tanba nee, vitima sira sente tauk no vitima sira ba hela hamutuk iha uma ida deit.
Arguidu sira atua ho livre no ho objetivu espesífiku, servisu hamutuk hodi duni tuir vitima sira no hakilar atu oho, sobu uma, baraka no lutu neebe harii nuudar meiu atu invade ka okupa ema seluk nia propriedade, ho intensaun atu ezerse direitu no pose ba rai liu husi ameasa sira neebe provoka tauk permanente, rezultadu neebe sira reprezenta.
Sira mos hatene katak sira nia asaun sira nee bandu no bele hetan kastigu kriminal.
Nunee arguidu sira komete, hanesan autor sira, krime usuparsaun de imovel neebe previstu no punidu husi artigu 261.º, no. 1 husi Kodigu Penal.
Lezadu MC deklara, rai nee lezadu nia inan aman nia, no lezadu nia aman mak kuda kafe, kuda ai-teka no bua iha laran.
Lezadu dehan, bainhira lezadu nia inan-aman sira atu mate, lezadu nia inan-aman hatudu rai ba lezadu iha tempu Português kedas.
Lezadu dehan, ai-farina nee lezadu nia alin mak kuda iha laran no rai nee lezadu sira halo uma iha laran.
Lezadu esplika, iha momentu nee arguidu sira hamutuk ho ema barak loos iha dader nee, tanba lezadu tun ba nee arguidu sira sunu hela karau luhan no lutu sira neebe mak haleu iha toos laran no arguidu sira sunu rai iha toos laran.
Lezadu deklara, arguidu sira ba tesi tiha uma baraka neebe mak iha tos laran. No sasan sira neebe mak estraga mak hanesan karau luhan, uma barak, kafe, ai-farina no lutu neebe mak haleu iha laran.
Lezadu dehan, arguidu sira lori ho katana hodi ameasa lezadu katak atu tesi lezadu sira nia kakorok.
Lezadu dehan, arguidu CGL mak entrega katana ba iha nia maun DGL hodi taa lezadu, maibe lezadu halai no arguidu sira koalia katak rai nee sira nia.
Lezadu dehan, too agora rai nee seidauk ba rejistu iha Terras Propriedade Servisu Nasional Kadastro.
Durante tempu Português no too agora lezadu sira mak hamoos no lezadu sira mak kuda kafe no ai-haan sira iha laran.
No durante nee sira la reklama dehan rai nee sira nia.
Aleinde nee lezadu BdS hateten, iha loron 18 iha fulan Abril tinan 2025, lezadu sira iha rai neebe mak daudaun problema nee, lezadu sira ba haree toos no bainhira too iha neeba haree arguidu sira estraga tiha ai-horis sira neebe mak iha laran mak hanesan ai-teka, ai-farina, no kafe inklui uma haat mak iha laran, no sira estraga deit mak lutu, uma rua mak estraga, no ai-farina tahan no kafe sira nee sira estraga hotu.
Nia dehan, rai nee lezadu sira iha laran dezde tempu Português nia, no arguidu sira ba asaltu sira ba ho ema barak no lori kroat hodi ameasa sira. No rai nee hetan husi avo sira nuudar tiu rasik.
No durante nee sira la halo buat ida iha laran, dezde tempu Português lezadu sira mak kuda, no tanba sa mak sira ba hadau nee lezadu la hatene.
Rona tiha parte sira nee Tribunal deside tama ba alegasaun Ministeriu Publiku no parte Defeza nia.
Iha alegasaun Ministeriu Publiku reprezenta Prokurador, Ricardo Leite husu Tribunal atu kondena arguidu sira ho pena prizaun tinan 2 no suspende ba tinan 4.
No parte defeza husu Tribunal atu absolve arguidu sira husi krime ida nee, tanba arguidu sira mos la klaru no estatutu ba rai mos la klaru.
Rona tiha parte sira nee Tribunal deside muda ba loron 19, oras tuku 10, hodi rona desizaun ikus.
Iha audensia Julgamentu nee prezide husi Juiza singular estajiaria, Ministeriu Publiku reprezenta Prokurador, Ricardo Leite no arguidu sira hetan asistensia legal husi Defensor Publiku estajiariu nain ida.
(ter)
