DILI, STLTIMORLESTE.com – Relasiona ho kazu soe bebe neebe akontese hela deit, halo ema preokupa ho situasaun refere, tanba bebe neebe foin moris iha direitu atu haree mundu nia beleza, basa nia mos kriatura Maromak nian. Husu ba inan aman sira atu eduka no tau matan nafatin ba oan sira nia movimentu moris loro-loron, atu nunee labele lao sala dalan.
Tuir Katekista João Soares Leite hatete, moris humana signifika ema moris neebe iha fuan, sentimentu no kakutak hodi bele hanoin tuir saida mak Nai Maromak kria nanis, tanba ema moris diferensia ho balada seluk ka animal. Bainhira inan ida hanoin soe bebe, hanesan aktu krime ida neebe kontra vida humanu ema nian. Hahalok no kazu nee sempre akontese ba joven feto no mane neebe seidauk prontu simu realidade no halao responsabilidade nuudar inan no aman, maibe tanba ransu livre hodi monu ba dalan sala no ikus tenke sai hanesan nee.
Nia dehan, hanesan kazu neebe foin akontese iha Sabado nee, mais sorte inan nee la konsege soe maibe fo fali ba maluk neebe hetan nia asaun nee. Haree ba kazu nee sempre, akontese nee atu fo sala ba se. Primeiru mak bolu atensaun ba familial sira, liu-liu inan aman sira mak atu kontrola oan sira tantu feto i mane.
Tuir nia, soe bebe nee hahalok ida neebe kontra tebes maromak nia ukun fuan no vida humana nudar sarani katolika neebe diak. Buat sira nee hotu akontese, laos atu fo sala ba inan aman no familia, maibe dala ruma tanba familia okupadu liu tiha ho servisu nian entaun haluha tiha atu tau matan ba oan sira.
Moris iha familia oan sira tenke rona inan aman nia hanorin no liafuan, atu nunee bainhira ita oan atu hakat ba dalan neebe sala liafuan inan aman sira nian neebe sira bele fo hanoin fali mai ita. Ida neemak importante ba oan sira atu rona sira, tanba sira nia liafuan nee orasaun mai ita oan. Inan aman sira mos tenke uza tempu barak iha familia, liuliu ho oan sira, hanesan iha tempu matabisu hamutuk, han meudia nunee mos ho han kalan nian. Reza hamutuk no nonton televizaun hamutuk, atu nunee bele iha konversaun familia entre inan aman no oan sira. Iha loron Domingo lori oan sira ba igreja hodi rona maromak nia liafuan, atu nunee hodi fo hanoin no fanu nafatin atu keta lao ba dalan neebe sala, dehan nia ba STL iha Komoro, Segunda (15/06/2026).
Nia afirma, bainhira iha familia inan aman preokupa liu ho servisu no asuntu seluk, maibe tenke atensaun no kontrola nafatin oan sira. Presiza uza tempu barak ba oan sira, hodi husu tuir, haree tutuir no kontrola sira nia oras tama sai husi uma.
Nunee mos Sidadaun Ivana do Rosario katak, kazu sira hanesan nee sempre akontese ba joven sira neebe ho idade kiik, tanba seidauk iha hanoin luan. Tanba neemak sira la prontu simu realidade bainhira hetan bebe ka kous labarik. Sira hatene deit halo relasaun seksual, maibe saida mak sira sei hasoru tan ba oin, nee sira la hatene. Neebe iha kazu hanesan nee ema sempre fo sala ba inan aman. Iha parte ida inan aman koalia hela deit, mais labarik lakohi atu rona, halo inan aman mos kole i baruk atu koalia tan ona. Neebe bainhira inan aman baruk i kole ona, entaun oan sira aporveita hodi livre halo tun sae. Neebe hakarak i lakohi inan aman labele senti kole ba oan sira nia moris, tenke uza maneira oioin atu sira bele lao tuir dalan los.
Ita inan aman mak baruk no kole atu hasee oan sira nia hahalok, semak atu hasee fali sira. Neebe hakarak i lakohi buat hotu fila ba ita inan aman, tanba sira nia dalan no futur nee iha inan aman sira nia liman, dehan nia.
Nia afirma, buat importante neebe presiza tebes hanorin ba sira atu abitua iha moris lor-loron nian reza hamutuk, halo orasaun no ba igreja. Baihira abitua oan sira ho dalan ida, fiar katak oan sira sei ona no lao tuir dalan neebe los. Neebe ho kazu sira neebe akontese nee atu fo hanoin no bolu atensaun ba inan aman sira, atu ida-idak tau matan ba oan sira nia movimentu lor-loron.
Entertantu informasaun neebe diariu nee asesu iha media sosial katak, iha dia 13 Junu tinan nee mais menus tuku 18:50 ema lori bebe mane ida neebe foin moris ba konsulta iha Klinika Kampung Baru, maibe nia inan neebe hahoris nia halai tiha husi fatin neebe bebe nee hetan.
Polisia kontinua halo investigasaun no konsege identifika suspeita hanesan AMK.
Hafoin prosesu identifikasaun no interrogatoriu inisial, suspeita konfesa katak bebe nee nia oan rasik neebe foin moris. Suspeita admite katak nia partus mesak iha nia kuartu iha Asrama Dom Bosco antes de abandona bebe nee.
Dadaun nee inan no bebe transfere ona ba Hospital Nasional Guido Valadares (HNGV), hodi hetan akompanhamentu husi mediku sira.
(dom)
