AMBENO, STLTIMORLESTE.com – Governu Timor Leste (TL) liu husi Diresaun Servisu Edukasaun Rejiaun Administrativa Espesial Oecusse-Ambeno (SRE-RAEOA), iha loron Segunda (15/06/2026), selebra asina kontratu ho servidor estadu iha Diresaun Edukasaun Oecusse hamutuk 263 pesoas.
Tuir Diretor Diresaun Servisu Rejional Oecusse, Vincencio Cono ba STL hafoin abertura kontratu ho Profesor/profesora sira, Gabinete Admininistrasaun Tekniku, Guarda Eskolar no funsionariu Administrasaun Eskola iha Salaun Edukasaun Santa Rosa, Suku Costa, Postu Administrativu Pantemakassar, RAEOA, katak ohin selebra asina akordu pesoal servisu iha area edukasaun Oecusse hamutuk 263 pesoas.
“Lo-loos nee, pesoal servisu iha area edukasaun iha Oecusse seidauk too, tanba profesor nee ami presiza 150 tan.mak bele hatan ba nesesidade bazika, liu-liu ba ensinu baziku nomos sekundaria sira, barak liu mak ba terseiru siklu sira iha lingua ingleza, português. Ita hatene katak profesores nee tenke espesifiku husi desportu, artistika para ita kadi labarik sira nia abilidade de aprendizajen,” dehan nia.
Nia haktuir tan katak, kontratu nee tanba hetan aprovasaun husi Prezidente Autoridade Rejiaun Administrativa Espesial Oecusse-Ambeno (PA-RAOA), Regio da Cruz Salu iha semana kotuk, bainhira submete iha loron 5 Junhu 2026, katak iha pasadu kontratu ho durasaun fulan 6, tanba nee agora daudaun mos governu tau nafatin osan ba tinan oin, ba fulan 6 maibe edukasaun mesak deit, menus husi total asina kontratu ohin nee hamutuk 263.
“Iha edukasaun ami opta tempu pasadu, iha Sekretariu Rejional Edukasaun no Servisu Sosial (SRESS) mai Sekretariu Rejional Edukasaun asuntu Sosial (SREAS), mai fali too ohin loron mak Diresaun Serbisu Rejional Edukasaun (SRE) neebe tutela instituisaun 4 laran mak Institutu Nasional Seguransa Sosial (INSS), Servisu Solidariedade Sosial, Sekretariu Estadu Formasaun Profesional no emprego (SEFOPE) no Sentru Formasaun Profesional Bansone ho total asina kontratu hamutuk 263 pesoas, aban bainrua sira sei integra fali ba iha sira nia instituisaun idak-idak, tanba nee ami koalia ona atu selebra entrega ema sira nee ba kada instituisaun para ami haree deit ba instituisaun edukasaun.
Nia afirma, haree liu ba guarda eskola sei menus mos, tanba eskola iha Oecusse hamutuk 108, inklui pesoal administrasaun ba eskola sira, atu koordenador, diretor no profesor sira, livre husi servisu administrasaun, servisu nee fo ba tekniku administrasaun iha eskola nee.
“Ami presiza tebes ba iha futuru, tanba ita sei koalia nafatin atu hetan kontratu no teste ruma ou loke vaga ruma para bele priense, eskola balun tenke tau serbisu administrasaun para bele jere eskola liu-liu ba biblioteka, mini biblioteka sira atu jere ho didiak, bainhira estudante sira impresta livru ba uma, mobiliarius eskola, neebe husi kontratu sira nee, dirijentes eskola sira maka serbisu hamutuk ho serbisu administrasaun eskola ninian,” akresenta Vincencio.
Nia haktuir tan katak, iha mos Servisu Gabinete Administrasaun Tekniku (GAT) ka funsionariu serbisu apoiu tekniku administrasaun kada eskola, ida nee importante tebes, atu asegura serbisu administrasaun iha kada eskola.
Total funsionariu permanente no Kontratadu iha SRE-RAEOA hamutuk 1.117 pesoas inklui permanente sira iha Serbisu Rejional Edukasaun.
“Ohin estadu kontratu 263 nee atu tau matan ba serbisu estadu ida nee ninia kontinuidade de serbisu no asegura nafatin responsabilidade, nee lao oportunidade atu hetan serbisu laos oportunidade para hetan serbisu deit, tanba nee tenke halo balansu ba ita ninia dever ho direto nee tenke balansu iha pontualidade, manera de falar, dedikasaun ba servisu no tenke iha disponibilidade atu bele aprende buat foun no disponivel iha koalker tempu, bain hira estadu presiza, karik iha servisu extra-ruma karik, tenke partisipa,” dehan nia.
Nia haktuir tan katak, edukasaun atu kualidade nee, primeiru husi ninia ema, liu-liu ba professor sira, tenke iha dedikasaun neebe ema bolu dehan sentimentu de partensia ba iha ninia profesionalidade, depois kona ba materias didaktikus.
“Ita tau tiha ona orsamentu konsesoens escolar, para bele aselera ida nee hamutuk ho orsamentu ba atividade extrakurikular sira. Kona ba mobiliarius eskolas, oras nee proposta tama ona iha parte aprovizionamentu RAEOA, atu hetan tenderizasaun iha tinan ida nee, inklui capital menor sira hanesan komputador balun atu sosa. Grasa maromak nian, iha Eskola Secundaria Jeral Palaban Oecusse, hetan ona atensaun makaas husi Ministeriu Edukasaun, liu-liu sekretariu Estadu edukasaun asuntu ensino sekundaria e tekniku vokasional, entrega ona projector nomos balun neebe moderniza prosesu aprendizajen,” dehan nia.
Iha oportunidade hanesan, Maria Wilfrida Opat, nuudar manorin iha Eskola Bazika Central (EBC) Palaban Oecusse, sente orgulhu no kontente teb-tebes tanba ohin selebra asina kontratu kontinuasaun nuudar professor hodi eduka estudante sira iha area edukasaun iha eskola neebe haknaar aan ba.
“Hau hatoo sentimentu kontente teb-tebes no orgulhu tanba ohin asina kontratu tan ho governu atu kontinua hau nia knar nuudar manorin ou profesora iha eskola EBC Palaban, tanba nee espera katak knar neebe nia assume sei kontinua asegura hodi halao serbisu ba oin,” dehan nia.
Tuir observasaun STL iha selebra asina akordu nee husi parte Rekursu Umanu Serbisu Rejional Edukasaun RAEOA, ofisialmente entrega kontratu ba Diretor Diresaun Serbisu Edukasaun Rejional RAEOA, Vincencio Cono abertura asina kontratu nee liu husi entrega termu asina kontratu ba funsionariu kontratadu sira, reprezenta funsionariu 263.
(jos)
