AMBENO, STLTIMORLESTE.com – Diretor Servisu Rejional Edukasaun Rejiaun Administrativa Espesial Oecusse-Ambeno (SRE-RAEOA), Vincencio Cono responde informasaun neebe viral iha media sosial neebe levanta husi Ministra Finansas katak, ezekusaun Orsamentu Jeral Estadu (OJE) tinan 2026 ba Oecusse lentu, ida nee impaktu husi mudansa estrutura.
“Hau atu afirma kona-ba preokupasaun neebe viral ona iha media sosial neebe ami akompanha, hau hanoin ezekusaun OJE iha Oecusse lentu, impaktu ida mos husi mudansas estrutura, prezudika mos ezekusaun OJE 2026, neebe aloka mai iha RAEOA, hodi fo impaktu ba ninia prosentazen de Ezekusaun,” dehan Diretor Servisu Rejional Edukasaun RAEOA, Vincencio Cono ba STL hafoin abertura selebra asina kontratu ho funsionariu kontratadu sira hamutuk 263 iha Salaun Edukasaun Santa Rosa Sidade Oecusse, Segunda (15/06/2026).
Responde kona-ba ezekusaun OJE iha SRE, Vincencio dehan, SRE ninia ezekusaun OJE 2026 neebe mai husi osan Konsesoens Eskolar no merenda eskolar, sedauk indika prosentazen neebe maka indika mai, tanba relatoriu sedauk kompletu, tanba nee kuandu kompletu ona maka foin fo sai rezultadu ezekusaun ninia prosentazen.
Antes nee Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu afirma, ezekusaun OJE ba RAEOA tinan 2026, sedauk sae tanba impaktu husi mudansa estrutura husi tranjitoriu ba definitivu.
Nia dehan, Estrutura RAEOA Tranjitoriu, simu responsabilidade serbisu iha fulan Setembru tinan 2026, ho taxa ezekusaun administrasaun sesante nian rai hela ba estrutura tranjitoriu foin 31% deit.
Estrutura RAEOA atual simu responsibilidade iha fulan Setembru 2025 ho taxa ezekusaun administrasaun sesante nian, rai hela ba ami foin 31% deit, husi loron 1 Setembru too 31 Dezembru 2025, maski dehan ami lahatene serbisu maibe konsege ezekuta 80% OJE 2025, Ezekusaun nee boot primeira vez iha istoria autoridade RAEOA nian,” dehan nia.
Nia haktuir tan katak, taxa ezekusaun ida nee hatudu no hakarak hateten deit katak ami Oecusse Ambeno nia oan neebe lidera RAEOA, iha opurtunidade. Ohin nee atu serbisu laos atu lao lentu. Anti estagnasaun no lakohi estagna dezenvolvimentu iha encalve (rai ketan) Oecusse Ambeno nia mudansa.
“Fiar ba Maromak, fiar ba ita nia povu, ita sei lori Oecusse Ambeno, modelu dezenvolvimentu reziliente no sustentavel TL,” dehan nia.
Nunee mos Ministru Obras Publiku (MOP), Samuel Marsal rekonhese katak, ezekusaun OJE ba RAEOA lao lentu tanba mudansa estrutura no foin estabelese Sekretariu Fundu Espesial ba Dezenvolvimentu, tanba nee fiar katak, ba oin serbisu sei hakaas aan, laos deit ezekuta orsamentu estadu ho lalais maibe tenke iha mos ninia implikasaun diak ba povu Oecusse no diak ba nasaun TL.
(jos)
