DILI, STLTIMORLESTE.com – Prezidente Republika (PR), Jose Ramos Horta lansa livru kona-ba The Rising Sun Timor Leste journey to peace and development, no hatoo palestra iha universidade taylor no institutu diplomasia no relasaun estranjeiru malazia nian.
Ohin Tersa (16/06) Prezidente Republika Jose Ramos Horta partisipa iha almosu privadu neebe organiza husi Primeiru Ministru Malazia nian, Dato Seri Anwar Ibrahim.
Destaka husi vizita nee mak Prezidente Ramos Horta lansa livru ho títulu The Rising Sun Timor-Lestes Journey to Peace and Development, neebe hakerek husi Dra. Murni Wan Mohd Nor no ko-autoria husi Nurul Farhah Ab Aziz.
Livru nee relata Timor Leste nia tranzisaun husi okupasaun no rezistensia ba independensia, rekonsiliasaun, no konstrusaun nasaun.
Dr. Murni Wan Mohd Nor iha Doutoramentu iha Direitu Konstitusional no Direitus Humanus no servisu nuudar Peskizadora Espesialista iha Institutu Diplomasia no relasaun estranjeiru (IDFR), lidera unidade peskiza no publikasaun sira. Ho esperiensia liu tinan 15, nia hakerek ona obra sira hanesan From Hate to Hope no edita Fostering Resilient and Equitable Futures Through Inclusivity and Sustainability. Nia fo konsellu ba Revisaun Periodika Universal Malazia nian, fo formasaun ba diplomata sira, no konsulta ba META no Organizasaun Komunidade Internasional sira. Nia mos fo advokasia ba kontra rasismu liu husi livru labarik nian When Love Heals Hate.
Nurul Farhah Ab Aziz nuudar Ofisial Peskiza iha Institutu Diplomasia no Relasaun Estranjeiru (IDFR), Ministeriu Negosius Estranjeiru Malazia nian. Nia iha lisensiadura iha siensia polítika husi Universidade Izlamika Internasional Malazia nian (IIUM) no uluk servisu iha Media Prima Berhad no Institutu Estratejia no Lideransa Aziatiku (ASLI) iha komunikasaun korporativa no relasaun publika.
Hafoin lansamentu, Prezidente sei hatoo diskursu kona-ba tema Navega Tempu Turbulentu, hodi alkansa dame tuir konvite husi Dato Zainol Rahim Zainuddin, Diretor Jeral Institutu Diplomasia no Negosiu Estranjeiru (IDFR), Ministeriu Negosiu Estranjeiru Malazia nian.
“Iha mundu ida neebe muda lalais liu duke uluk neebe nfluensiadu husi intelijensia artifisial, disrupsaun klimatika, no tensaun jeopolítika sira fasil atu lakon iha ita-nia orientasaun moral sira. Maibe valor sira neebe orienta ita-nia luta ba independensia sai nafatin ita-nia busola aten-barani atu koalia lia-loos ba poder, empatia ba ema seluk nia sofrimentu, rezistensia hasoru derrota ida, no kompromisu neebe metin ba dignidade umana,” dehan PR Horta.
Prezidente Republika hatete, Malazia no Timor Leste partilha laos deit jeografia ida, maibe konviksaun ida katak mundu ida neebe diak liu harii laos hosi ezersitu ka algoritmu sira, maibe husi líder sira no sidadaun sira neebe lakohi abandona buat neebe loos ba buat neebe fasil.
“Hau orgulhu tebes atu lansa Dra. Murni Wan Mohd Nor nia livru, The Rising Sun Timor-Lestes Journey to Peace and Development, neebe kaptura esensia loloos husi ita-nia nasaun nia reziliensia no esperansa. Hau agradese ba Primeiru Ministru Anwar Ibrahim, Institutu Diplomasia no Relasaun Estranjeiru, Universidade Taylor no povu Malazia ba sira-nia amizade no vizionariedade kontinua,” deklara Prezidente Jose Ramos Horta.
Prezidente Ramos Horta sei fila fali ba Dili iha loron 17 Junu 2026, hodi konklui nia vizita iha Malazia hodi hametin lasu entre Timor-Leste no Malazia enkuantu destaka kbiit edukasaun, lembransa, no valor umanu sira neebe partillada.
(eme)
