MAUBiSSE, STLTIMORLESTE.com – Negosiantes neebe mak faan sira nian produtu iha merkadu Maubessi hetan rendimentu diak.
Tuir Mariana Marques nuudar negosiante iha merkadu Maubisse hatete, kada loron sira sempre hetan rendimentu, maske daudaun nee ema sei hadia hela merkadu ida nee, maibe kada loron sira hetan rendimentu husi ema neebe halo viajen ba mai husi Dili sosa sira nian produtu husi merkadu refere, produtu neebe sira faan hanesan talas, aifarina, fehuk, koto nurak, koto, mostarda, lakeru mutin, repoilhu, senora, aimanas, salsa, tomati no seluk tan.
“Produtu hirak neebe mak ami faan iha nee sosa tutan husi ema seluk depois ami faan fali, dala ruma loron ida ami hetan rendimentu too US$ 40 ou US$ 50, depende produtu neebe ami faan no ema sosa, depois haree ba ema nian viajen husi Dili mai foho no husi foho ba Dili, nee sira para sosa modo sira nee,” dehan Mariana ba STL iha Maubisse, Tersa nee (16/06/2026).
Nia dehan, bainhira ema viajen barak nee rendimentu tuir ida nee, tanba dala ruma menus, nee loron ida hetan US$ 30 resin, se lae la too ida nee, kuandu ema barak nee loron ida bele hetan too US$ 40 resin, ema sosa barak liu mak alfasi, koto nurak, repolhu, senora, koto nurak no lakeru mutin.
“Sasan neebe mak ami faan nee sosa tutan deit husi ema seluk, tanba laos ami mak kuda, ita faan modo barak nee ninia rendimentu mos barak, loro-loron ami nian atividades negosiu lao diak hanesan baibain,” nia dehan.
Tuir observasaun STL iha terenu Tersa nee katak, negosiante sira faan modo oin-oin deit ho nia presu neebe mak la hanesan, koto maran plastik ida dolar ida no rua, koto nurak balde ida dolar ida, tomati dolar ida, produtu neebe negosiante sira faan ho ninia presu neebe mak la hanesan, balun dolar ida no balun faan ba dolar rua.
(jac)
