BAUCAU, STLTIMORLESTE.com – Erozaun afeta ba estrada nasional diresaun Baucau-Lautem iha area baliza entre Suku Caibada Macasa’e ho Buruma, Postu Administrativu Baucau Vila, Munisipiu Baucau, amesadu atu kotu total, inklui afeta mos irigasaun trandisional Uaileua neebe fornese bee ba natar sira iha Suku Buruma kotu total.
Xefe Suku Buruma, Liborio dos Santos Freitas aprezenta, estrada nasional diresaun Lautem-Baucau iha area baliza entre Suku Caibada Macasa’e no Buruma neebe atual afeta husi erozaun monu ho distansia metru 50 nee, antes fulan hirak liu ba iha ona sinais, maibe parte kompetente liu liu Ministeriu Obras Publikas (MOP) la tau atensaun seriu nunee iha loron hirak liu ba estrada refere monu makaas iha semana nee.
“Erozaun hanesan nee nia evidensia ita nia nota impaktu husi bee. Agora grave loos sei ativu hela nia movimentu nee, maibe ita la nota, tanba nia lao neineik los, ita haree nia mudansa iha hela deit,” hateten Xefe Suku Buruma ba STL liu husi telefone, Tersa (16/06/2026).
Nia sublina, mezmu kondisaun estrada grave fo impaktu ba movimentasaun transporte publiku no privadu diresaun Lautem-Baucau kontinua utiliza, maibe nafatin utiliza estrada refere, tanba estrada alternativa liu husi area Dokobere Buruma ba Uaiquinari Caibada Macasa’e mosu iha Sentru Saude Tirilolo, transporte publiku neebe tula pasajeiru barak no transporte privadu neebe tula sasan todan labele liu husi estrada refere, tanba sae suvida makaas.
Nunee transporte publiku no privadu sira nafatin liu husi estrada diresaun neebe atual afeta husi erozaun iha area baliza entre Suku Caibada Macasa’e no Buruma, maibe fo risku ba motovimentu ema ho transporte, tanba kada oras estrada neebe afeta ba erozaun hatudu mudansa.
“Hau hanoin fo amesa ba ita tranporte sira, tanba ita nia maluk neebe la hatene kondisaun nee bele hetan dezastre tanba estrada nee agora grave loos ona. Maibe laos fo impaktu deit ba movimentasaun, fo impaktu mos ba setor agrikultura, tanba bee dalan neebe fornese bee ba natar sira mos kotu total,” Liborio fundamenta.
Nia katak, irigasaun trandisional nee fornese bee ba natar hekare 50 resin no kondisaun erozaun afeta ba irigasaun nee komunidade agrikultores sira esforsu atu normaliza, maibe labele, tanba kada oras estrutura rai kontinua mudansa ho neineik.
Nia informa, kondisaun estrada neebe amesadu atu kotu total, Autoridade Suku Buruma relata ona ba parte kompetente liu husi telefone no Tekniku Destakadu Obras Publikas Munisipiu Baucau too ona terrenu halo observasaun, maibe seidauk relata rezultadu.
“Estrada ho irigasaun trandisional nee nia kotu nia panjan lebar nee kuaze 50 meter hanesan nee, ohin obras publikas oberva ona. Ami nia rekomendasaun mak lalais normaliza estrada no irigasaun nee,” Liborio haktuir.
(tom)
