DILI, STLTIMORLESTE.com – Projetu konstrusaun Kuartel Jeral Polísia Nasional Timor Leste (PNTL) paradu hela, tanba Tribunal de Contas Seidauk hasai emisaun.
Nia dehan, forsa mayor/force majeure rua ne’e mak hanesan empreza internasional Shanghai Construction Group Co, Ltd neebe ezekuta obra nee nia kontratu mate ona no forsa mayor seluk mak Tribunal de Constas seiduak fo vistu hodi hein hela justifikasaun husi parte relevante sira kona-ba proposta empreza nian husu tan orsamentu adisionál 20%.
Nia esplika, projetu nee ho valór kontratu inisial US$ 13,228,909.78 ka kuaze milhaun US$ 13,2 no tuir kontratu tenke termina iha fulan Setembru tinan 2027, maibe too agora paradu no la hatudu progresu neebe diak iha terrenu.
“Husi Tribunal de Contas seidauk hasai emisaun nee, tanba seidauk iha vistu, prosesu nee agora lao iha Konselhu Administrasaun Fundu Infraestrutura (KAFI). Planeamentu PNTL ninian servisu nafatin hamutuk ho tékniku sira husi Ministeriu Interiór (MI) no mos husi KAFI para halo justifikasaun bá iha Tribunal de Consta, iha semana kotuk halo tiha ona komunikasaun formál balun ba iha Tribunal de Contas,” hatete Komandante Administrasaun PNTL, Komisáriu Asistente Polísia Arquimino Ramos ba jornalista sira iha Ministru Interiór, Tersa (16/06/2026).
Nia informa, bainhira hetan tiha informasaun lubuk ida, justifikasaun nee ba tiha, hein katak Tribunal de Contas aseita ona atu kontinua konstrusaun, maibe nee kompetensia Gabinete Ministru Interiór ninian.
“Konstrusaun sei hein hela Tribunal de Contas tanba iha razaun rua Tribunal de Consta kestiona mak ida justifikasaun kona-ba tanba saida mak aumenta ba orsamentu 20% husi totál orsamentu ba konstrusaun Kuartel Jerál PNTL. Ida seluk mak kontratu ba kompanhia nee mate tiha ona iha tinan 2021, tanba nee mak presiza iha justifikasaun para Tribunal de Consta bele aseita,” nia deklara.
Nia koalia, obra seidauk lao sei paradu hela, hein desizaun husi Tribunal de Contas.
Iha fatin hanesan, Segundu Komandante Jerál PNTL, Komisária Assistente Polísia Natercia Eufrasia Soares Martins esplika, kondisaun Kuartel Jeral PNTL neebe agora daudaun uza nee nakfera hotu ona no la seguru atu ema servisu iha okos.
“Kuartel Jerál ida agora polísia sira uza nee tinan hira ona, ita haree nia kondisaun, nia nakfera tiha depois ita lori buat ida plamer nee taka tiha ida nakfera nee para taka ida nakfera sira iha laran nee, nee risku boot ba iha polísia,” nia dehan.
Nia espera katak ho lideransa exelensia Ministru Interior nia hanoin diak ba polísia oinsa mak atu bele kria fasilidade ida neebe mak dignu no mos para nunee fasilita polísia sira atu halo servisu no konsentra ba servisu seguransa ba komunidade sira.
Nia hatutan, Governu Timor Leste liu husi Ministériu Interior hahu ona projetu konstrusaun foun ba kuartel Jeral PNTL iha Caicoli, neebe tuir kontratu atu termina iha tinan rua nia laran iha fulan Setembru 2027.
Nia afirma, parte konsultoriu nian, kompahia lokál Gihon Lda Timor Leste servisu hamutuk ho PT. Wanukarsa Mega Cita husi Indonézia iha sistema joint venture. Kompanhia rua nee responsavel ba dezenhu edifísiu no mos supervizaun obra nian durante konstrusaun.
(jen)
