BAUCAU, STLTIMORLESTE.com – Autoridade Suku sei loke estrada foun ba setor produtividade sira iha area Suku Buruma, Postu Administrativu Baucau Vila, Munisipiu Baucau nomos sei konstrui kampu multi funsaun ba jovem sira iha Suku laran.
Xefe Suku Buruma, Liborio dos Santos Freitas aprezenta, planu prioridade tinan 2026 neebe Autoridade Suku Buruma ajusta ba orsamentu husi Programa Nasional Dezenvimentu Suku (PNDS) regular tinan fiskal nee, mak atu loke estrada foun distansia Kilometru (Km) 2 resin iha Aldeia Ono-Sere husi area Afaetacai ba Lialuga fatin kuda budu tasi nian.
“Ita nia objetivu loke estrada foun nee mak atu liga ba area produtivu, area agrikultura no seluk tan mak area turizmu. Tanba fatin neeba ita konsidera hanesan potensial ba fatin turizmu,” hateten Xefe Suku Buruma ba STL liu husi telefone, Tersa (16/06/2026)
Nia sublina, objetivu prinsipal husi planu Autoridade Suku nian ba loke estrada foun Km 2 resin nee, atu ajuda komunidade agrikultores no ortikultura sira asesu estrada, tanba durante nee komunidade agrikultores sira bainhira hare koilheta no komunidade ortikultura sira koilheta produtu hanesan tomate, tenke lalin ho distansia dook hafoin asesu estrada tula ba transporte neebe sira aluga.
Nunee Autoridade Suku deside orsamentu PNDS tinan 2026 atu loke estrada foun hodi fasilita komunidade agrikultores no ortikultura sira, asesu asesu transporte besik liu tan, no loke estrada foun nee moos nuudar meus ida motiva komunidade agrikultores no ortikultura sira badinas liu tan halo produsaun iha Buruma iha rai produtividade hamutuk hektares 400 resin neebe ezistidu no sei hamoris mos fatin Lialuga neebe konsidera fatin sitiu turizmu lokal.
Aliende iha implementasaun programa PNDS regular tinan 2026 nee, Suku Buruma mos hetan orsamentu adisional neebe sei konstrui mos kampu multi funsaun ba jovem talentozu Buruma oan sira atu promove talentu liu liu iha area desportiva.
“Ida kampu multi funsaun nian nee ita hetan rihun US$ 17 resin ida regular ba loke estrada foun nee rihun US$ 38 resin nee mak hau hetan husi PNDS,” Liborio informa
Entretantu, prosesu preparasaun ba implementasaun programa PNDS tinan 2026 iha Suku Buruma atual iha faze distribuisaun koutasaun no bainhira prosesu remata sei hakat ba faze avaliasaun no mobilizasaun material no trabalhador, neebe tuir planu sei implementa iha fulan Junhu nee.
(tom)
