DILI, STLTIMORLESTE.com – Ekipa Prezidensia Republika (PR) apoiu nesesidade baziku (NB) Urjensia ba inan Leonarda Ximenes de Jesus nomos oan nain 5 neebe durante nee abandona husi nia laen.
Prezidensia Republika liu husi Diresaun Serbisu Sosial No Assuntu Sosial, apoiu aihan nesesidade baziku nomos osan oituan ba inan Leonarda Ximenes de Jesus nomos oan nain 5 neebe durante nee abandona husi nia laen, hela iha aldeia moris foun, suku Komoro Posto Administrativu Dom Aleixo Munisipiu Dili.
Iha biban nee Inan Leonarda Ximenes de Jesus ba Jornalista iha knaar fatin Suku Komoro, Tersa (16/06/2026) hatoo agradese ba Prezidente Republika Jose Ramos Horta tanba rona nia lian halerik durante nee ohin haruka ekipa tun hodi haree direita nia kondisaun moris nomos apoiu nesesidade baziku nomos osan ba nia hodi sustenta nia oan nain lima.
Leonarda hatete hatoo agradese ba Prezidente Republika Jose Ramos Horta tanba Prezidente nia matan naroman hanesan fitun monu ba rai no tilun nee rona tebes nia lian halerik durante nee tanba liu husi Jornalista sira nia publikasaun halo Prezidente rona ohin mai ajuda netik nia.
“Husi jornalista hotu hotu hanesan anjo ida neebe Nain Maromak rona sira nia lian ohin loron ekipa Prezidente lori aihan mai hakmaan hau nia hamlaha, tanba hau hamlaha ba aihan maibe familia atu mai tauk, hau hamrook bee iha ema nain rua deit mak ajuda bee mos ba hau, tanba nee hau fo obrigado ba nain Prezidente ho nain Xefe Suku ho senhora Bendita neebe ajuda hau bee mos ba hau durante tinan tolu nia laran,” katak nia.
Nia hatete, durante nee hasoru dezafiu oin oin maibe laiha ema ida mak bele ajuda so iha ema ida ka rua deit mak bele ajuda nia liu husi fo bee mos ba sira rua nia oan hodi uza han hemu, maibe ohin loron hetan tulun husi Prezidente Republika nia ekipa.
“Karik loron ida hau foti ain hakat sai husi fatin ida nee hau tebes Prezidente nia tulun no ajuda hakmaan hau ho transporte ruma nunee hau fila ba hau nia rai Soibada hodi buka moris haree hau nia oan nain 5, obrigada wain ba nain Prezidente ho nia ekipa sira nomos ekipa suku komoro ho nia membru sira tanba ho grasa nain Maromak nia imi hakmaan ona hau iha rai klean ida nee,” katak nia.
Nia mos konta katak dadaun nee nia ho nia oan kiik mak hela iha Dili, maibe nia oan nain haat hela ho nia familia sira iha Soibada. Nia oan boot nain rua nia aman husik hela tanba relizaun lahanesan ikus fahe malu. Nia moris hamutuk fali ho laen agora husi Munisipiu Likisa nia iha oan nain tolu maibe ikus laen husik hela iha tinan 2023 bainhira nia oan kiik iha isin fulan tolu, aman abandona hodi fila fali ba nia feen boot, tanba nee dadaun nia mesak tau matan ba oan nain 5.
Nia konta katak, durante nee moris lahakmatek tanba iha presaun husi laen nia familia, tanba nee nia deside sobu nia uma hodi muda fali ba iha Soibada Munisipiu Manatutu.
Nunee mos Kordenadora Diresaun Serbisu sosial no assuntu sosial, Prezidensia Republika Tereza do Santos Ximenes hatete antes fo apoiu Prezidente hetan imformasaun sira nee mai husi media, tanba nee orienta kedas ekipa hodi apoiu nesesidade baziku hodi tahan netin ba loron balun nia laran.
“Apoiu nee laos ba tinan naruk maibe apoiu urjente ida atu kompleta deit ba nesesidade ba inan ho oan ba loron balun, no apoiu neebe iha mak hanesan fos, Mina, no osan oituan nunee bele uza ba semana hira nia laran,” katak Kordenadora.
Kordenadora dehan, atu apoiu inan ho oan fila ba nia moris fatin, ekipa Prezidensia Republika prontu apoiu kareta hodi tula sasan sira nee ba nia fatin bainhira hetan ona data klaru husi Autoridade Lokal Suku Komoro nia.
“Bainhira autoridade lokal kuandu prepara ona data fiksu bainhira mak familia nee fila fali ba nia knua ami sei rejolve halo nusa para apoiu transporte tula ba soibada,” katak Kordenadora.
Oinsa husi Prezidensia Republika nia apoiu ba labarik nain 5 neebe abandona husi nia aman nain rua hatan ba kestaun nee kordenadora hatete ohin rona ona preokupasaun husi inan nee, too palasiu kordenadora sei komunika ho Prezidente Republika Jose Ramos Horta hodi bele fo apoiu ruma.
“Ida nee hau sei komunika ho Prezidente Republika ida nee hau sei la promete no labele hatoo kedas tenke iha kordenasaun diak ho sua exelensia Prezidente no ba iha Ministeriu ka parte neebe apoiu ba iha bolsu estudu nee,” dehan Kordenadora.
Nunee mos Xefe Suku Komoro, Eligio J.D. Marcal hatoo agradese ba Prezidensia Republika neebe apoiu ona nesesidade baziku nomos osan oituan hodi hakmaan netik nia sidadaun nee ho nia oan sira moris iha fulan balun nia laran.
“Nuudar autoridade suku agradese tebes ba apoiu ida nee atu fo ba nia, maibe iha buat balun neebe ami esklarese ba ita boot sira katak ita boot sira lori mai hanesan nee iha sorin sorin halo ona presaun,” katak Xefe Suku.
Hatete tuir nia haree inan nee ho oan durante nee sempre ba vizita iha Suku no nia hasoru problema laos agora maibe kleur ona, no problema sira nee mos rejistu iha ministeriu publiku no durante nee iha presaun barak lost anba haree ba situasaun nia hela iha mane nia familia nia klaran, no mane nia familia nia fuan laharee ba labarik.
Xefe Suku hatete, lo-loos mane nia familia labele halo presaun tanba nia alin no oan nia ran iha oan nain tolu. No inan nee la sente hakmatek iha fatin nee tanba nee husu autoridade lokal atu sobu nia uma muda fali ba nia moris fatin soibada.
“Ba parte ida hanesan autoridade bele hatete lae lalika maibe liafuan nee todan ba nia se karik hatete lalika, karik nia familia mak besik ba nia karik nia bele curhat ba nia hodikalan hau hasoru hanesan nee maibe haree ba uma sorin sorin mesak mane nia familia tanba nee nia sente presaun boot los, tanba nee nia hatete ba hau tanba nee hau hatete se hau autoriza bainhira mana nia familia maun bin, tio neebe besik mai hamriik para dehan agora bele sai hau mesak deit hamriik hanesan autoridade diak kalae? keta halo ikus mai dehan nia uma iha hela tanba saida sobu, ami familia lahatene agora sobu nia ba neebe tanba nee hau hakarak nia familia mai para ita sobu ba entrega ba nia familia,” katak Xefe Suku.
Xefe Suku hatete, tuir nia haree durante laen abandona labarik iha isin fulan tolu buka moris iha dalan ninin liu husi faan sasan kiik sira iha estrada too labarik ohin loron boot tinan rua ona.
(eme)
