DILI, STLTIMORLESTE.com – Ministeriu Justisa liu husi Diresaun Jeral Servisu Rejistu Notariadu (DGSRN), simu ona kaderneta pasaporte ba etapa daruak hamutuk 3500, husi kompanhia Thales.
Diretor Jeral Servisu Rejistu Notariadu, Agustinho Gonsalves Viera esplika, kompanhia Thales hatama tan ona kaderneta pasaporte ba etapa daruak nia hamutuk 3.500, iha fulan Maiu foin lalais nee.
“Kaderneta pasaporte ba tinan ida nee tama hotu ona no foin lalais ba iha etapa dahuluk nian tama iha fulan kotuk nee, kaderneta pasaporte hamutuk rihun 60 no agora ba etapa daruak nia 3.500, entaun kaderneta sira nee tama hotu ona ba iha iha tinan ida nee,” dehan Diretor ba jornalista sira iha nia knaar fatin Kolmera, Tersa (16/06/2026).
Nia hatutan, Ministeriu Justisa mos hahu halo tan ona akizisaun ba stok kaderneta pasaporte ba iha tinan 2027 nia, tanba tinan 2026 nia tama hotu ona.
Nia dehan, ba stok pasaporte ba iha tinan 2027 nee, agora daudaun akizisaun lao daudaun ona, ita tau orsamentu hamutuk milhaun US$ 1 resin hanesan nee.
Antes nee mos Ministru Justisa, Sérgio Hornai afirma, kaderneta pasaporte rihun 60 too Timor Leste, ministru simu ona husi kompanhia no akizisaun kaderneta pasaporte nee rasik hamutuk pur volta rihun 60.
“Husu ita hotu buka esforsu nafatin atu labele iha interrupsaun ba iha ita nia atendimentu sira, pasaporte mai ona imi bele ba halo imi nia pasaporte, no pasaporte tama uluk mak rihun 60,” deklara MJ antes nee.
Sergio sublina, prosesu lao kleur oituan, tanba produsaun laos halo iha Timor, maibe situasaun balun tenke dependensia ba produs iha rai liur mak lori mai, entaun han tempu oituan.
Nia akresenta, produsaun pasaporte refere halo iha nasaun Polandia ho montante hamutuk milhaun US$ 1. Total pasaporte hamutuk rihun 75.
Aleinde nee Akademiku Rafael de Jesus dehan, governu liu husi MJ tenke kria planu diak atu kontinua produs kaderneta passaporte, tanba ohin loron publiku barak mak trata dokumentus halao servisu iha rai liur.
“Importante tenke iha planu atu kompania bele kontinua produs, atu labele akontese fali hanesan uluk, ita hatene katak ohin loron Timor oan barak maka trata passaporte hodi sai ba liur,” dehan nia.
(ter)
