AMBENO, STLTIMORLESTE.com – Vendedores sira iha merkadu Maumate, Aldeia Baki, Suku Naimeko, Postu Administrativu Pantemakassar, Rejiaun Administrativa Espesial Oecusse Ambeno, kontinua faan sira nia modo latan deit iha rai neebe la ijiene.
Tuir Domingos Soares nuudar komprador husi Sidade Oecusse, sente triste ho kondisaun riil neebe maluk vendedor sira kada loron Tersa feira nuudar loron merkadu iha Maumate, maibe haree kondisaun merkadu nee ladun diak, tanba antes nee governu planu atu hadia atu vendedores sira faan iha balkaun ho fatin higiene, maibe too ohin loron sedauk iha intervensaun husi governu Autoridade Rejiaun Administrativa Espesial Oecusse-Ambeno (RAEOA).
“Hau hanesan komprador modo iha merkadu Maumate, sente triste ho kondisaun riil neebe povu infrenta iha merkadu refere, realidade fatin la iha ona, maluk vendedor sira husi foho, lori sira nia modo neebe fresku, maibe tau deit iha rai, ema lao ba mai, rai rahun sae makaas, halo modo sira neebe fresku, belit ho rai rahun, tanba nee husu ba governu Autoridade RAEOA, atu haree kondisaun riil neebe maluk vendedor sira infrenta iha merkadu Maumate,” dehan nia ba STL iha Merkadu Maumate Aldeia Baki, Tersa (16/06/2026).
Nia haktuir tan katak, iha merkadu provizoriu Nunbei neebe lokaliza iha area urbana Oecusse, iha loron bai-bain vendedor sira faan modo iha Baraka no modo sira nee sira tau iha hadak leten, neebe maske merkadu provizoriu maibe sei iha kondisaun, iha merkadu maumate nee, vendedor permanente sira kontinua faan iha Baraka leten, maibe sira husi foho mai tuur deit iha rai maka faan sira nia modo, dose no aihan seluk-seluk tan.
Iha fatin hanesan, Sisilia Neno nuudar vendedor ambulante konfesa katak, realidade neebe maka sira hasoru iha merkadu Maumate, kada loron Tersa Feira hanesan loron merkadu, lori sira nia modo latan deit iha rai tanba fatin la iha ona.
“Iha merkadu nee ema barak maka mai buka osan liu husi lori sira nia produtu, tanba nee kada loron Tersa, ami sempre haksesuk maluk kona ba fatin faan, dala ruma ita mai uluk ona, ema neebe faan nanis iha merkadu nee, lori sira nia produtu, duni ita muda ses husi fatin neebe ita faan, tanba nee husu ba governu atu hadia ona merkadu nee, atu nunee ami povu kiik faan sasan ho Higiene,” dehan nia.
Antes nee, Diretor Serbisu Rejional Komersiu no Industria, Orlando Quelo dehan, durante nee sira observa ona kondisaun merkadu sira iha Oecusse, no sei iha planu atu tau kondisoens atu nunee povu bele buka moris liu husi atividades negosiu.
“Ami identifika ona merkadu sira iha Oecusse, atu nunee tau iha planu reabilita, realidade merkadu Nunbei iha area urbana Oecusse, hahu muda ona ita nia vendedores sira ba merkadu provizoriu atu nunee, halo konstrusaun ba merkadu refere, atu nunee fasilita ita nia vendedor sira hodi faan sasan ho diak,” dehan nia.
Tuir observasaun STL iha merkadu sira iha Oecusse, kada loron merkadu vendedor sira sempre faan deit sasan okupa mos Estrada publiku iha areador merkadu, tanba vendedores barak liu fali komprador neebe maka sosa sasan iha merkadu.
(jos)
