DILI, STLTIMORLESTE.com – Kazu konaba sosa fardamentu ba Polisia Unidade Maritima (UPM) no manutensaun roo NRTL iha Dili ho roo NRTL iha Hera, neebe alega envolve husi arguidu nain haat (4), tama ona ba iha faze alegasaun husi Ministeriu Publiku (MP) no Defeza arguidu sira nian.
Prosesu nee Tribunal halo separasaun tiha, hodi rona uluk arguidu LM hanesan Eis Komandante Jeral PNTL, arguidu HdC hanesan eis Komandante Komando Administrasaun PNTL, arguida CdRdCS nuudar eis Inspetora GIA Sekretariu Estadu Seguransa (SES), no arguidu JdC nuudar eis Diretor aprovezionamentu (SES).
Alegasaun neebe halao iha loron Kuarta nee (17/06/2026) Ministeriu Publiku neebe reprezenta husi Prokurador Rafael Gusmão deklara katak, hafoin rona tiha arguidu sira nia deklarasaun no sasin sira nia deklarasaun, Ministeriu Publiku konklui katak prosesu ida nee arguidu sira iha konhesimentu.
Prokurador deklara, arguidu sira aprova konaba pedidu neebe hatoo husi Superintendente LdSS, no too ikus mai prosesa hodi hatama fardamentu mai iha UPM.
Bazeia ba deklarasaun neebe arguidu sira hatoo iha julgamentu no deklarasaun sasin sira nian, Prokurador husu Tribunal Koletivu tetu atu aplika justisa ba iha arguidu nain haat.
Aleinde nee defeza arguida CdRdCS nian, Defensor Publiku Fransisco deklara katak, arguida CdRdCS nuudar eis Inspetora GIA Sekretariu Estadu Seguransa (SES).
Defeza deklara katak, ba iha prosesu nee defeza konklui katak, krime neebe Ministeriu Publiku dun ba iha arguida la priense elementu subjetivu no objetivu, tanba arguida la asina kontratu, la simu benefisiu no halo akordu ruma.
Defeza deklara, konaba fornese fardamentu, arguida la asina kontratu konaba fardamentu nian, la simu benefisiu ruma, maibe observa deit hodi hatoo fali ba iha eis Sekretariu Estadu Seguransa (SES), tanba nee defeza konklui la priense elementu objetivu.
Defeza deklara tan, konaba manutensaun ba iha roo rua arguida hato deit pareser no observasaun, arguida laos peritu hodi avalia servisu neebe iha. Arguida la simu kontratu manutensaun konaba roo nian, tanba nee defeza konsidera la priense elementu konaba manutensaun roo nian, tanba arguida la asina kontratu no aprova pedidu.
Defeza deklara, prejuizu neebe iha labele atribui ba iha arguida, no ikus defeza husu Tribunal atu absolve arguida husi krime neebe Ministeriu Publiku akuza ba.
Aleind nee, Defeza arguidu JdC, Defensor Publiku Jenini Daus deklara katak, arguidu nuudar eis Diretor aprovezionamentu SES.
Defeza deklara, arguidu momentu neeba arguidu laos halao servisu mesak, maibe iha diresaun balu neebe tutela iha arguidu nia okos. Tanba nee pedidu neebe arguida sertifika nee diresaun nee haree hotu ona, tanba nee hatoo ba iha arguidu nia meza signifika loos ona, ho ida nee arguidu sertifika.
Defeza deklara, Ministeriu Publiku sei iha duvidas ba akuzasaun neebe iha, no arguidu nia aktu la priense ba iha krime neebe MP akuza. Ho MP nian duvidas neebe iha husu Tribunal mak deside, defeza konklui husu Tribunal atu absolve arguidu JdC.
Enkuantu Defeza husi arguidu LM no arguidu HdC deklara katak, arguidu LM hanesan Eis Komandante Jeral no arguidu HdC hanesan Eis Komandante Komando Administrasaun PNTL. Defeza deklara, depois rona tiha arguidu no sasin sira nia deklarasaun, defeza konsidera akuzasaun neebe iha la provadu no arguidu nain rua nia aktu la prense ba krime neebe MP akuza. Tanba nee defeza husu Tribunal atu absolve arguidu nain rua husi krime neebe akuza, no indimizasaun.
Rona tiha alegasaun, Tribunal adia ba loron seluk hodi rona leitura akordaun.
Audensia julgamentu nee prezide husi Juiz Koletivu, Argentino Nunes, Julmira Auxiliadora, Ivan Patrocenio, Ministeriu Publiku reprezenta husi Prokurador Rafael Gusmão no arguidu sira hetan asistensia legal husi Defensor Publiku no Advogadu Privadu nain tolu.
(ter)
