DILI, STLTIMORLESTE.com – Komando Polísia Nasional Timor-Leste (PNTL) liu husi Eskuadra Polísia Nain Feto sempre halo patrulhamentu atu fo seguransa ba komunidade sira husi krime.
Observasaun STL nia iha terenu, kalan-kalan Polisia Nasional Timor Leste (PNTL) sempre lao ain hodi fo seguransa masimu ba komunidade sira neebe lidera husi Inspetor Xefe Polísia Júlio Maia, realiza atividade patrulhamentu iha tempu kalan lao ain iha area jurisdisaun Postu Administrativu Nain Feto, Munisípiu Dili.
Entretantu patrulhamentu nee mak parte husi esforsu lideransa PNTL nian atu aumenta prezensa seguransa iha komunidade, espesialmente iha oras kalan neebe vulneravel ba kazu kriminalidade no disturbiu ordem publika.
Liu husi operasaun ida nee, membru PNTL sira halo ronda regular iha dalan prinsipal, area residensial, no fatin publiku sira neebe konsidera hanesan zona risku.
Iha fatin ketak, Segundo Komandante Jeral PNTL, Komisariu Assistente, Natercia Eufrasia Martins deklara, orden tun husi Komandante Jeral PNTL katak, kalan-kalan Membru sira tenke halo patrulhamentu iha sidade Dili hodi fo seguransa masimu ba komunidade sira neebe lao kalan no halo atividades negosiu.
Nia informa, objetivu prinsipal husi atividade nee mak atu prevene krime antes nia akontese, hamenus potensia violénsia no hatudu katak autoridade seguransa kontinua monitoriza situasaun iha Dili.
Aleinde nee, patrulhamentu iha tempu kalan mos ajuda hodi hametin sentimentu seguransa iha komunidade, nunee sidadaun sira bele sente seguru iha sira nia atividade loron-loron.
Nia afirma, operasaun patrulhamentu nee sei kontinua iha tempu kalan iha área Nain Feto no besik zona seluk iha Munisípiu Dili, parte husi estratejia PNTL hodi garante estabilidade no paz sosial iha sidade Dili.
(jen)
