DILI, STLTIMORLESTE.com – Komando Jeral Polisia Nasional Timor Leste (PNTL) kongratula servisu informasaun sekreta neebe esforsu makaas hodi identifika no kaptura grupu naok teen iha sidade Dili.
Nia dehan, iha semana kotuk servisu informasaun konjunta halo operasaun sekreta.
“Membru sira servisu makaas, ita rekonhese membru sira nia espiritu servi, sira hatudu duni iha pratika no identifika problema sira nee, maibe ita mos kongratula no valoriza ita ninia komunidade sira,” hatete Segundo Komandante Jeral PNTL,Komisariu Assistente, Natercia Eufrasia Martins ba jornalista sira iha Ministeriu Interior, Kuarta (17/06/2026).
Nia deklara, liu-liu komunidade sira neebe sempre halo komunikasaun ho PNTL wainhira sira rona katak sira haree iha aktus kriminal ruma mosu iha rai laran .
Nia nafatin orienta membru sira servisu hodi disiplina no respeitu nafatin direitus humanus hodi fo valor nafatin ba servisu polisia nian.
“Hau hanoin tenke servisu ho sakrifisu, disiplina ho loialidade, respeitu direitus humanus, ida nee mak sai valor polisia ninia atu hatudu liu husi polisia sira nia servisu loro-loron,” nia hatutan.
Entretantu suspeitu sira neebe PNTL kaptura iha suspeitu nain rua mak kumpri medida koasaun prizaun preventiva no nain tolu Tribunal aplika medida termu identidade rezidensia nomos suspeitu nain rua seluk Servisu Investigasaun Kriminal halo deit prosesu investigasaun.
(jen)
