DILI, STLTIMORLESTE.com – Ministeriu Publiku (MP) iha alegasaun ba krime Maus Tratus ho forma Violensia Domestika, husu Tribunal atu aplika pena suspensaun ba arguidu inisial MM hanesan laen.
Iha alegasaun nee Prokuradora haree katak, arguidu konfesa ba faktus halo duni agresaun hasoru lezada inisial AM neebe hanesan arguidu nia feen.
Ministeriu Publiku haree katak, atu halo prevensaun ba iha futuru, Ministeriu Publiku husu Tribunal atu aplika pena prizaun tinan 3, suspende tinan 4 ba arguidu.
Enkuantu husi parte defeza nian deklara katak, arguidu arepende ona ba nia aktu, tanba nee husu Tribunal atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, iha loron 19 fulan Setembru tinan 2024, iha Ministeriu Turizmu no Ambiente Dili, arguidu tebe ofendida dala tolu kona iha kotuk laran, dala ida iha hirus matan kona iha susun dala tolu, arguidu dada ofendida nia fuk hodi riba ba rai, no arguidu hasai kapasete hodi baku ofendida, maibe ofendida tahan netik ho liman.
Konsekuensia direta husi arguidu nia hahalok nee ofendida hetan moras iha ain, moras iha kotuk laran, moras iha hirus matan, ofendida ba halo tratamentu iha PRADET.
Iha loron 1 fulan Maiu tinan 2024, haleu oras tuku 19:00, arguidu tata ofendida nia liman parte los no karuk, arguidu lori termus kafe nian hodi tuku ba ofendida nia kanuruk.
Konsekuensia direta husi arguidu nia hahalok nee ofendida hetan kanek no raan sai husi liman parte los no karuk, no ofendida hetan infeksaun iha ulun.
Iha loron 4 fulan Maiu tinan 2024, iha Bayaleste, Dili, arguidu buti ofendida nia kakorok, hodi dudu ba armariu, arguidu tuku ofendida nia ulun dala rua no tuku ofendida nia hirus matan dala ida.
Arguidu halo ho forma livre, deliberada no konsientemente, hatene katak halo beibeik agresaun fizika hasoru lezada hanesan konsta iha akuzasaun, nuudar tratamentu fizika no psikika ladiak hasoru nia konjuje, tanba lezada hanesan arguidu nia ferik oan rasik, maske nunee arguidu pratika nafatin hodi konkretiza dunik ninia hakarak.
Tanba nee, konstitui arguidu nuudar autor material ho forma konsumadu ba pratika maus tratus ba konjuje ho forma violensia domestika ida, previstu no punidu tuir artigu 1540 husi Kodigu Penal konjuga ho artigu sira 2,3 alinea a) no artigu 35″ alinea b) husi Lei Kontra Violensia Domestika n.º07/2010, loron 07 fulan Julhu.
Audensia julgamentu nee prezide husi Juiz Koletivu, Jumiati Freitas, Jose Quintao, Jose Gonsalves, Ministeriu Publiku (MP) reprezenta husi Prokuradora Bemvinda do Rojario, arguidu hetan asistensia legal husi Advogada Privada.
(ter)
