DILI, STLTIMORLESTE.com – Primeiru Ministru (PM), Kay Rala Xanana Gusmão halo vizita espozisaun hodi haree besik produtu oin-oin neebe iha Sentru Loja Universal, iha sidade Kazan-Tatarstan.
Sentru Loja Universal iha Kazan revitalizadu hanesan Sentru ba Artezanatu Uniku, regularmente sai uma-nain ba espozisaun oi-oin no programa kultural sira neebe hetan apoiu husi Governu Repúblika Tatarstan nian.
Produtu internal nebe aprezenta iha espozisaun mak hanesan material funu, roo kareta, ekipamentus pezadu sira inklui material sira seluk.
Primeiru Ministru Kay Rala Xanana Gusmão hatete, nia parte agradese tebes ba entidade husi Kazan neebe konvida mai iha espozisaun nee.
Ami agradese tebes ba ita boot sira, tanba lori ami mai iha expo ida nee. Iha área barak mak ami haree, hanesan agrikultura, kareta eletrika, industria, naviu no seluk tan. Diak, hau la bele hanoin hotu-hotu iha tempu ida deit, maibe hau fiar katak oportunidade ida-nee sei sai oportunidade diak tebes ba ami,” hatete Primeiru Ministru ba jornalista sira iha Sentru Loja Universal, iha sidade Kazan-Tatarstan, Kuarta (18/06/2026).
Iha mos sspozisaun Downy Shawl nuudar projetu kolaborativu ida neebe hetan apoiu husi governu hodi hatudu artezanatu soru no textil nian.
Espozisaun Samovar neebe hatudu kolesaun samovar tradisional sira. Espozisaun Moda no Dezenu Lokal neebe hatudu obra sira no kolesaun moda nian husi Uniaun Dezenador sira Tatarstan nian.
Aleinde espozisaun sira, sentru nee mos organiza feira artezanatu sira hanesan bazar sira, atrasaun muzikal sira husi Orkestra Infantil Tatarstan nian, no projesaun sira hosi filme kultural sira.
Aleinde nee iha mos espozisaun “Made in Tatarstan” nuudar espozisaun estratejiku ida neebe hatudu potensial industrial tomak, teknolojia aas no kapasidade esportasaun sira Republika Tatarstan nian.
Espozisaun nee dala barak halao ho baze rotativa hodi koinside ho forum internasional boot sira no Simeira Estadu sira iha rejiaun.
Espozisaun nee normalmente destaka seitor prinsipal sira, hanesan Enerjia no Petroleu hodi hatudu teknolojia avansadu sira iha esplorasaun no prosesamentu.
Aeroespasial no Automotivu maka hatudu inovasaun sira iha fabrikasaun veíkulu no aeroespasial.
Vizita nee Primeiru Ministru, Xanana Gusmão akompanha husi Xefe Republika Tatarstan, Rustam Minnikhanov.
(alb)
