DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru Malazia, Dato Seri Anwar Ibrahim reforsa kooperasaun estratejika ba dezenvolvimentu no integrasaun iha ASEAN.
Prezidente Republika Jose Ramos Horta ba jornalista iha Aeroportu Internasional Nicolau Lobato, Komoro, Kuarta (17/06/2026) hatete, durante halao viajen privadu ba Malazia halo hasoru malu ho Primeiru Ministru Alende halo almosu privadu neebe organiza husi Primeiru Ministru Malazia nian, Dato Seri Anwar Ibrahim.
“Hasoru malu mos ho Primeiru Ministru almosu ho nia ho ekipa tomak momentu nee enkontru hotu ho hau, nia liu kedas ba Aeroporto ba simeira Rusia ASEAN ke maun boot Primeiru Ministru Xanana mos partisipa iha neeba,” dehan PR Horta.
Prezidente Republika halo enkontru kortezia ho Primeiru Ministru Malazia iha rezidensia ofisial iha Putrajaya. Reuniaun nee, neebe lao iha ambiente kordial tebes, serve hodi reafirma lasu amizade no haklean relasaun bilateral, neebe remata ho almosu ofisial ida neebe oferese hodi fo onra ba Xefe Estadu Timor Leste nian, iha ambitu husi ninia vizita ofisial ba nasaun nee.
Durante enkontru nee, líder nain rua koalia kona-ba tema sira ho interese komun, ho destake ba reforsu iha kooperasaun ekonomika, komersial no investimentu. Sublina mos importansia husi dezenvolvimentu kapital umanu, liu husi edukasaun no formasaun teknika no profisional (TVET), nuudar pilar ba kreximentu sustentavel.
Prezidente Ramos Horta hatoo agradesimentu ba apoiu istoriku Malazia nian no enkoraja investidor malaziu sira atu esplora oportunidade sira iha Timor-Leste, hodi destaka estabilidade polítika no kondisaun sira neebe favoravel ba investimentu iha setor sira hanesan infraestrutura, turizmu no ekonomia dijital.
Adezaun Timor-Leste nian ba ASEAN sai nuudar pontu sentral iha diskusaun nee, neebe Prezidente hatoo agradesimentu ba apoiu husi Malazia no sublina katak integrasaun rejional mak prioridade estratejika ida.
Primeiru Ministru, Anwar Ibrahim hatete, Malazia konsidera Timor-Leste nuudar parseiru besik no membru importante ida husi família ASEAN, no kompromete atu fo apoiu ba prosesu nee.
Lider nain-rua manifesta sira-nia determinasaun atu kontinua reforsa kooperasaun ba benefísiu povu rua nee nian no ba promosaun pas, estabilidade no prosperidade iha rejiaun tomak.
(eme)
