BAUCAU, STLTIMORLESTE.com – Vitima dezastre naturais husu Autoridade Protesaun Sivil (APC) pratika asaun justu no neutru iha faze re-verifikasaun ba vitima dezastre naturais neebe naran elimina husi lista material rekuperasaun 2026.
Vitima dezastre naturais husi Aldeia Lutumutu, Suku Tirilolo, Postu Baucau Vila, Georgina da Costa Ximenes dos Reis konta, iha fulan Fevereiru 2024 bainhira anin boot silu kulu hun ida hanehan nia uma hela fatin, rezulta kuartu tolu inklui sala ida hetan estragus total.
Nunee informa kedas ba APC Munisipiu Baucau too fatin hodi fo apoiu emerjensia ba vitima sira no halo levantamentu dadus ba estragus refere, maibe kuaze vitima dezastre naturais nee hein material rekuperasaun tempu naruk no durante fulan 6 iha udan laran, tanba nee re-konstrui fali nia uma hodi hela ho montante rihun US$ 2 resin, kobre ba sosa kalen, semente, tula rai henek no kado ai, maibe hikus haree uma diak ona naran elimina husi lista material rekuperasaun 2026.
“Sira mai re-verifikasaun nee ami nia uma diak tiha ona, maibe sira la dehan atu hetan ga la hetan sira la dehan, mais depois dadus sai hau konfirma katak, hau la merese atu hetan ajudus husi Protesaun Sivil. Hau triste tanba nuudar sidadaun Timor oan,” Georgina espresa.
Vitima dezastre naturais nee kestiona servisu ekipa re-verifikasaun husi APC la justu, tanba nia uma hetan estragus total kuartu tolu inklui sala ida, maibe la hetan material rekuperasaun hanesan maluk sira seluk hetan iha loron 10 Junhu nee, tanba iha momentu distribuisaun Sekretariu Estadu Protesaun Sivil deklara, sidadaun Timor oan neebe uma hetan estragus iha direitu atu hetan material rekuperasaun, maibe nia uma hetan estragus total iha parte kuartu tolu inklui sala ida, maibe tama iha lista elimasaun.
Mezmu naran elimina iha lista material rekuperasaun 2026 nee, maibe vitima nee submete ona karta reklamasaun iha APC Munisipiu Baucau no kontinua ona ba Nasional atu halo hikas re-verifikasaun iha tempu badak.
“Ho esperansa boot husu ba Autoridade Protesaun Sivil tenke justu iha re-verifikasaun labele halo diskriminasaun, tanba sidadaun hotu iha direitu hetan apoiu tuir lei neebe asegura iha ita nia rai,” Georgina rekomenda.
(tom)
