DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial AG ho arguida inisial NdSM, tanba lori Madre MB nia naran bosok lezadu sira fo osan atu haruka oan sira ba eskola iha nasaun Italia, maibe ikus mai la konsege.
Iha indisius sufisiente katak, iha loron 19 fulan Janeiru tinan 2021, iha tuku 15h00, iha Aldeia Malabe, Suku Malabe, Postu Atsabe, Ermera.
Iha oras refere arguidu AG hasoru malu ho lezadu JdS ho nia familia, MA ho nia familia, CMP ho nia familia.
Iha hasoru malu refere arguidu AG hanesan autor prinsipal hatoo programa kona-ba eskola no servisu iha nasaun Italia.
Arguidu AG esplika ba lezadu sira (faktos 2) katak “hau” AG hetan ona dalan atu haruka lezadu sira nia oan “hanesan Imaculada no sira seluk) ba eskola no servisu iha nasaun Italia.
Arguidu dehan “hau” AG servisu hamutuk ho Madre MB husi kongregasaun Kanossiana ho arguida NdSM katak, “imi nia oan sira sei ba eskola no servisu iha Italia”.
Esplika tiha kona ba eskola no servisu iha nasaun Italia, lezadu sira mos konvensidu depois arguidu AG husu kedas lezadu sira nia numeru telefone. Depois arguidu AG fo tutan numeru lezadu sira nian ba madre MB.
Madre MB telefone Direta ba lezadu sira (fakto 2) perante arguidu AG, Madre MB reforsa informasaun neebe mak arguidu AG deskreve ba lezadu sira (faktos 4) ho nia familia katak, sei haruka lezadu nia bei-oan Imaculada no sira seluk ba eskola iha Italia no iha neeba Imaculada eskola husi tuku 8 dadeer too tuku 12, depois husi tuku 1 too tuku 5 loraik, Imaculada sei servisu ku ai-fuan no servisu refere Imaculada sei manan osan nove mil dolares por mes.
Husi esplikasaun Madre MB halo lezadu sira fiar ho liafuan sira temi iha leten, iha konversa liu husi telefone arguidu AG ho Madre nee husu ba lezadu sira katak tenki lori manu, fahi no asu.
Lori tais feto kada ema ida tais rua. Madre nee dehan katak iha Italia Imaculada ho sira seluk sei servisu hamoos vidru, suku roupa no sei manan osan ketak fali no estudante sira sei hela iha apartementu.
Lezadu sira fiar no lezadu JdS entrega osan US$ 12000 ba arguidu AG, lezadu MA entrega osan US$ 5000 ba arguidu AG, lezadu JdDG entrega US$6.465 ba arguidu AG nomos lezada ho inisial C entrega US$ 16 000 ba arguidu AG.
Osan sira nee arguidu AG simu husi lezadu sira depois arguidu lori fali mai entrega tutan ba arguida NdSM no arguida NdSM entrega hotu ba Madre MB.
Osan sira neebe mak arguidu AG rekolha husi lezadu sira objetivu atu trata dokumentos hanesan pasaporte, tiket aviaun no seluk tan molok lezadu sira nia oan aranka ba Italia.
Ikus mai programa ba eskola no servisu neebe aprezenta husi arguidu sira la realiza, iha fim do ano de 2021 lezadu aprezenta keixa.
Konsekuensia husi arguidu sira nia hahalok bosok hanesan deskreve iha leten, lezadu sira hetan prejuizu ho valor neebe deskreve.
Arguidu AG uza Madre MB nia naran hodi pratika nia konduta ho forma livre, deliberada ho konsiensia rasik hodi tau forsa hamutuk ho arguida NdSM hodi ba bosok no engano lezadu sira ho programa eskola no servisu lori Madre nia naran atu lezadu sira fiar. Atu nunee arguidu NdSM hetan benefisiu husi ema seluk nia kosar ben, hatene hela katak hahalok bosok ka engano ema seluk hodi hariku-an nuudar hahalok neebe lei proibe, maibe arguidu sira hakarak halo nafatin hanesan saida mak deskreve iha leten.
Ho hahalok sira nee, konstitui arguidu AG no NdSM nuudar ko-autor material ho forma konsumada ba pratika konkursu ba krime Burla Agravada hamutuk haat (4) tuir artigu 267 norma sira husi Kodigu Penal.
Hatan ba akuzasaun nee arguidu AG no arguida NdSM deklara katak, faktus neebe konsta iha akuzasaun balu los no balu lalos.
Arguidu no arguida deklara, sira simu duni osan husi lezadu sira, maibe kuantidade ba iha valor mak la hanesan.
Tribunal halo identifikasaun liu deit, Tribunal deside adia ba iha loron, 09/07/oras tuku 3 loraik hodi rona arguidu AG no arguida NdSM nia deklarasaun kompletu.
Audensia julgamentu nee prezide husi Juiz Koletivu, Jose Maria, Ana Paula, Ersilia de Jesus, Ministeriu Publiku reprezenta husi Prokurador Bartolomeo de Araujo, arguidu nain rua hetan asistensia legal husi Defensora Publika Laura Valente.
(ter)
