DILI, STLTIMORLESTE.com – Tribunal Kontas deside rekuza pedidu konaba konstrusaun Kuartel Jeral Polisia Nasional Timor Leste (PNTL), tanba la priense regra konaba vistu previa nian.
“Vistu previa pedidu tama tiha ona mai Tribunal karik paradu nee tanba rekuza, karik rekuza hau hanoin ho lei foun sai konaba atividade nee seidauk lao, maibe tanba rekuza tiha nee pedidu foun seidauk mai, sei haree fali orsamentu ratifika nee mak pedidu husi instituisaun sira seidauk mai konaba vistu nee, uluk rekuza haruka fila tiha mak paradu nee,” dehan Prezidente Tribunal Rekursu, Afonso Carmona ba jornalista sira iha Tribunal Rekursu, Kinta (18/06/2026).
Nia esplika, se sira sente iha interese tenke haruka pedidu foun ba fali iha Tribunal, tanba nee se kompanhia mak antes nee haruka ona pedidu ba la hetan vistu previa husi Tribunal no rekuza, agora se kompanhia iha interese kontinua hatama fali pedidu foun ba iha Tribunal.
Nia argumenta, Tribunal rekuza pedidu neebe haruka uluk ba, tanba la priense regra neebe vistu nian, ho ida nee Tribunal la simu. Tanba uluk nee bele hola projeitu husi parte seluk nee 20%, agora ho lei foun la dehan ona, sira bele aproveita ida nee hodi halo pedidu foun.
Nia afirma, uluk termina tiha 20%, tanba nee se muda la tuir regra labele tanba lei mak dehan nunee. No uluk atu halo mudansa aumenta osan labele liu 20% husi projetu seluk nian, tanba nee se sira halo pedidu iha osan la iha problema, se sira halo pedidu la iha osan bele rekuza mos.
PTR Afonso dehan, ho mudansa ba lei foun la temi 20% ona, sira bele haree fali projetu sira neebe osan iha tau ba iha ida nee hodi halo. No regra iha atu halo vistu nee lei mak dehan, atu priense regra nee tenke haree fali artigu sira nee, karik atu hola fali osan husi projetu seluk aumenta mai atividade nee, primeiru osan nee iha ka lae, segundu se osan iha aumenta maibe labele liu 20%, tanba nee se pedidu mai liu 20% labele, se sira husu maibe osan la iha.
Ho lei foun la temi 20%, sira bele halo fali pedidu foun mai.
“Rekuza ona iha desizaun ida ona katak ita labele lao paradu, ho mudansa ba lei nia bele halo pedidu, tanba iha oportunidade boot,” dehan PTR.
Nia dehan, Tribunal aplika regra deit, tanba nee ho lei foun 20% la temi ida, fo fatin ba sira atu halo pedidu foun, se sira hakarak atividade lao tenke hatoo fali pedidu foun.
Nia afirma, projetu sira halo nee bele hola fali projetu seluk 20% tau fali mai ita nian hodi realiza, maibe salariu labele book, projetu ho projetu bele taka, maibe labele liu 20%, tanba nee paradu bele mos la priense 20%, no atividade la temi iha Orsamentu Jeral Estadu nian.
Nia dehan, ho lei foun la temi 20%, tanba nee iha posibilidade boot sira bele halo fali pedidu, tanba ida rekuza nee desizaun tiha ona, tenke halo fali pedidu foun mak Tribunal haree hodi deside konaba vistu previa.
Iha fatin ketak, Akademiku UNTL, Sebastiao dos Santos dehan, atu hetan vistu previa tenke priense regra neebe iha, atu halo konstrusaun tuir lei preve.
“Hanoin importante liu husi vistu previa hodi haree kona-ba orsamentu, atu nunee ikus labele hamosu duvidas,” dehan nia.
Informa tan, Tribunal Kontas iha kompetensia atu haree didiak, atu desizaun konaba vistu previa neebe foti justu.
(ter)
