DILI, STLTIMORLESTE.com – Ministru Interiór (MI) Francisco da Costa Guterres hateten, semana oin komisaun rekrutamentu hahu reteste ba rekrutamentu vaga membru Polisia Nasional Timor Leste (PNTL) foun rihun 12 resin.
Nia dehan, komisaun sei halo verifikasaun ba dadus kandidata nain rihun 12 resin neebe antes nee kokore ona iha rekrutamentu vaga membru PNTL foun tinan 2025.
“Data fiksu nee semana oin sira (komisaun) komesa halo servisu ona. Servisu verifikasaun ba dadus sira. Verifikasaun dadus nee sira halo iha semana rua hotu, kompleta hotu tiha sira publika ona naran sira neebe tuir teste, para depois fo tempu komisaun para públika kalendariu ba teste,” hatete Ministru Interior (MI), Francisco da Costa Guterres ba jornalista sira iha Ministeriu Interiór, Kinta (18/06/2026).
Governante nee dehan, ba prosesu reteste ida nee komisaun liu husi juri rekrutamentu sei uza faze teste haat no sistema eliminatoriu. Tanba nee, faze ida mak verifikasaun dadus konkorente sira kuandu konkorente sira la liu iha faze selesaun dokumentu nee automátikamente elimina ona, kuandu liu entaun nia pasa ba teste prova kultural, kuandu pasa entaun ba faze tuir mai mak teste psikolojia, kuandu la pasa entaun elimina, kuandu pasa entaun pasa ba teste saude.
“Primeiru sira halo verifikasaun dokumentu sira neebe la priense rekezitus hela, haree tok sira nia dokumentu nee. Segundu haree ona ba teste, se nia dokumentu kompletu nia ba ona teste”, nia esplika.
Nia informa, teste tolu nee mak hanesan prova kultural depois mai teste psikolojia ka pisikotest no ida fali teste saude, neebe ida neebe mak hela iha teste prova kultural nia hela ona.
“Ita mantein dadus anterior, depois sira sae ba mak ida neebe hela kontinua hela, ida neebe hela fali iha psikotest ka teste pisikolojia nia hela ona. Ikus liu grupu neebe liu nee mak ba liu ona teste saude, saude mak hela tan balun nee teste tama. Nee ita aplika eliminatoriu hotu kedan”, nia deklara.
Ministru hateten, kriteriu idade nee la iha mudansa, husi tinan 18 too 23.
Governante nee dehan, kuandu konkorente sira nee tuir teste, kuandu numeru ida neebe mak liu iha faze ida ida, momentu neeba kedan komisaun anúnsia kedan no sei anúnsia fali konaba kalendariu teste psikolojia.
“Teste nee liu loron ida ka rua komisaun fo sai kedan rezultadu neebe ema neebe mak nia valór la priense nia mak hela liu iha teste sira nee”, nia Informa.
Ministru Interior nee espera fulan Agostu prosesu rekrutamentu vaga membru PNTL foun konklui no iha Setembru konkorente sira tama ona iha sentru formasaun Polisia no iha Fevereiru 2027 komesa finaliza sira nia kursu no koloka ona sira hodi komesa halo servisu polísia hodi reforsa instituisaun PNTL.
“Ita espera katak iha fulan Agostu, Setembru nee sira tama ona para sira kompleta sira nia, para Setembru, Outubru, Novembru kompleta sira nia kursu nee iha Fevereiru, no Fevereiru ita koloka ona sira fatin fatin no sira reforsa kedan servisu polísia,” nia koalia.
Nia hatutan, orsamentu ba rekrutamentu vaga membru PNTL foun nee iha aumenta oituan husi milhaun ida ba milhaun ida-resin.
“Orsamentu ba ida nee tanba ita iha aumenta tan numeru, entaun ita tenke aumenta farda entaun ita aumenta tan osan ita gasta tan milhaun ida resin,” katak nia.
Ministru garante prosesu rekrutamentu vaga membru PNTL foun sei lao transparante.
Iha biban nee mos Mimistru deklara, hasai ona diploma ministerial ba rekrutamentu vaga membru PNTL foun no hela komisaun atu implementa deit.
Nia dehan, tuir lo-loos Ministeriu Interior atu implementa rekrutamentu vaga membru PNTL foun nee iha Maiu, maibe tanba proposta husi PNTL husu para aumenta tan numeru vaga rekrutamentu husi 400 aumenta tan 350 tenke lori ba Konselhu Ministru para husu aprovasaun foun husi fali aprovasaun ba 350 nee, neebe aprova ona nee foin lalais media publika.
“Neebe agora ami halo ona nia prosedimentu agora semana oin ne’e entrega ona, Komando sira juri sira komesa servisu”, nia argumen.
Ministru Francisco hateten, Xefe ba juri ba Komisaun Rekrutamentu vaga PNTL nee lideradu Komisáriu Asisténte Polísia José Soares no Superintendente Xefe Polísia Ismael Babo.
“Husi Ministeriu Interior la tama, juri nee husi PNTL nain rua, PNTL nain rua mak horiseik komandante jeral tempu ona ida mak komandante José ida fali komandante Babo, nee sira depois husi polísia federal nain rua husi GNR nain rua ho tan funsaun públiku ida”, nia hatoo.
Ministru garante prosesu sira nee sei lao transparante no imparsial. “Hau hanoin diak ona, hau hanoin tanba iha sei harii mos kontinua harii nafatin komisaun monitorizasaun no fiskalizaun, komisaun ida nee ita hili ema sira neebe iha esperiensia para mai haree tuir nafatin,” nia esplika.
Ministru Francisco mos sei kontinua nafatin envolve komisaun monitorizasaun no fiskalizaun, hodi monitoriza rekrutamentu vaga PNTL nee.
“Sira neebe mak foin lalais ajuda ita loke sai problema ita sei hili fila fali tama iha laran atu kontinua sira nia servisu haree tuir nafatin para buat neebe mak sira halo nee tenke tuir regra no transparante”, nia konklui.
Antes nee Komandante Jerál Afonso dos Santos esplika, Komando Polisia Nasional Timor Leste (PNTL) nomeia ona atuál Komandante Komando Pesoa Formasaun Komisáriu Asisténte Polísia José Soares no Superintendente Xefe Polísia Ismael Babo hodi lidera ekipa juri ba rekrutamentu foun ba vaga Polisia nian.
“Hau hili ona ema nain rua Komandante José no Komandante Ismael Babo,” nia deklara.
Nia informa, nuudar Komandante Jerál PNTL fo konfiansa másimu ba ofisiál Superiór PNTL hodi lidera komisaun rekrutamentu liu-liu hodi sai juri iha rekrutamentu vaga ba membru PNTL foun nee.
“Hau fo konfiansa ba hau nia ema, halo nusa mak hau labele konfiansa, garante prosesu rekrutamentu sei lao diak no transparante no justu,” nia afirma.
(jen)
