KAZAN, STLTIMORLESTE.com – Prezidente Rusia, Vladimir Putin hatoo benvindu ba Timor Leste (TL) iha organizasaun Rejional ASEAN ba dala-11 no mos partisipasaun iha Rusia-ASEAN Summit 2026.
“Rusia valoriza relasaun ho ASEAN no membru hotu-hotu. Rusia prontu atu koopera ho parseiru hotu-hotu ASEAN nian,” hateten Vladimir Putin wainhira abertura no Sesaun Plenaria da-huluk ASEAN-Rusia Summit 2026 iha Sentru Ezebisaun Internasional Kazan, Kinta (18/06/2026).
Putin kompromete, iha sesaun Plenaria da-huluk nee Rusia sei hametin kooperasaun ekonomia no komersiu.
Nia dehan, summit nee sei loke oportunidade foun atu aumenta komersiu, investimentu no kooperasaun industrial entre Rusia ho nasaun ASEAN sira.
Rusia hakarak ASEAN sai parseiru estratejiku importante liu tán, liu husi komersiu, investimentu, enerjia no kooperasaun polítika, hamutuk promove mundu multipolar neebe bazeia ba respeitu mútuu no Lei Internasional,
Entretantu liu husi Simeira Rusia-ASEAN nee, Timor Leste mos buka oportunidade investimentu iha infraestrutura, agrikultura no enerjia.
TL mos aprende husi esperiensia ASEAN no Rusia kona-ba integrasaun rejional, aumenta kooperasaun edukasaun no formasaun rekursu umanu.
Iha Summit nee, lider sira mos diskute deklarasaun ida ho planu asaun foun atu orienta kooperasaun ASEAN–Rusia ba tinan sira oin mai.
Partisipasaun lider sira ASEAN nian iha abertura no Sesaun Plenaria da-huluk Rusia-ASEAN Summit 2026 mak hanesan Brunei Darusalam, Kamboja, Indonezia, Laos, Malazia, Myanmar, Filipina, Singapura, Tailandia, Timor Leste no Vietname.
Delegasaun Timor Leste lidera husi Primeiru Ministru, Kay Rala Xanana Gusmão,
Vise Primeiru Ministru Ministru Koordenadór ba Asuntu Ekonomiku, Ministru Turizmu no Ambiente, Francisco Kalbuadi Lay, Ministru Negosiu Estranjeiru no Kooperasaun, Bendito dos Santos Freitas, Vise Ministra ba Asuntu ASEAN nian, Milena Maria da Costa Rangel, Xefe Gabinete Primeiru Ministru, Elizabeth Gouveia Leite Exposto, Diretor-Jeral ba Asuntu ASEAN nian, Jorge Trindade Neves de Camões, Diretora Jeral ba Konsular no Protokolu Estadu, Josefina Carla Pompeia Tilman.
(alb)
