DILI, STLTIMORLESTE.com – Selesaun nasional Portugal tenke fahe pontu ho Kongo RD depois de rezultadu impata 1-1 iha jogu dahuluk faze grupu Kopa Mundial FIFA 2026 foin lalais nee, maibe adeptu sira iha Timor Leste (TL) nafatin optimista katak, ekipa neebe treinadu husi Roberto Martinez sei manan fali Uzbekistan no Colombia iha jogu rua tuir mai hodi foti pontu ho masimu iha grupu K.
Iha dezafiu foin neebe sei mai, Portugal sei hasoru Uzbekistan iha loron 24 fulan Junhu 2026, neebe halao iha estadiu Houston, Texas. Jogu nee sai xave boot ba ekipa rua nee hodi buka sira nia vitória primeiru, liu-liu ba Uzbekistan neebe lakon ona ho Colombia 1-3 iha jogu inisiu.
Depois de nee, dezafiu boot liu iha faze grupu nian mak hasoru Colombia, neebe agora nuudar lideransa temporariu iha grupu K. Jogu entre Portugal no Colombia sei akontese iha loron 28 Junhu 2026, lokal iha stadiu Miami, Florida. Jogu nee mak sei sai xave hodi determina pozisaun final antes atu hakat ba faze tuir mai.
Situasaun iha tabele klasifikasaun grupu K nian mos sai aperta liu tan, konsideira deit katak Colombia lidera ho pontu tolu, tuir kedas Portugal ho Kongo RD neebe konsege foti pontu ida ida. Ho dezafiu neebe boot, falhansu ida iha jogu sira tuir mai bele fo ameasa boot ba oportunidade Portugal nian atu kontinua sira nia mehi iha nivel mundial.
Tuir faktu husi jogu kotuk, João Nevez lori duni Portugal ba oituan ho golu selera iha minutu 6, maibe avansadu Kongo RD, Yoane Wissa konsege hatama fali golu hodi muda eskoru ba 1-1 antes intervalhu. Too apitu final, ekipa rua nee labele muda rezultadu maske hamosu oportunidade oi-oin iha kampu.
Rezultadu la masimu nee hetan mos reasaun husi adeptu selesaun nasional Portugal iha rai laran. Adeptu Rogério da Silva Magno hatoo nia preokupasaun maibe nafatin fiar katak Portugal sei buka fali vitoria jogu sira tuir mai.
“Hanesan adeptu sente oituan triste tanba labele manan Kongo RD, liu-liu kuandu lidera uluk ona. Linha defeza presiza hadia no konsentrasaun labele tun. Maske nunee fiar katak kontra Uzbekistan no Colombia, Cristiano Ronaldo ho ninia kolega sira sei hatudu abilidade masimu hodi foti pontu tolu no pasajen ba faze tuir mai,” dehan Rogério ba STL, Sesta nee (19/06/2026).
Adeptu Portugal iha Timor Leste nee mos fiar katak, ho esperiensia no kbiit tatika neebe ekipa nee iha, sira sei hadia lalais falhansu hodi domina hikas jogu rua tuir mai no lori kbiit foun ba dezafiu boot sira iha faze eliminasaun nian.
(car)
