DILI, STLTIMORLESTE.com – Prezidente Republika (PR), Jose Ramos Horta hatete, nia simu ona informasaun kona-ba rai nakdoko iha Munisípiu Viqueque, liu-liu iha Postu Administrativu Ossu no Uatulari neebe kada loron ida rai nakdoko dala tolu ka dala haat.
Prezidente Republika Jose Ramos Horta hatoo kestaun nee ba jornalista sira, bainhira remata halo enkontru ho membru Governu sira iha Palásiu Prezidensial Nicolau Lobato, Bairo Pite, Sesta (19/06/2026).
PR hatete, nia rona ona informasaun konaba rai nakdoko iha Viqueque, tanba nee Prezidente husu Governu nomos lider munisipiu sira presiza identifika komunidade neebe uma hetan estragus bele fo apoiu sira.
“Sim, hau simu informasaun nee parese ke rai nakdoko nee liu fali normal, maibe laos intensidade hanesan 7 ka 8, maibe iha Japaun rai nakdoko loron ida liu rihun ida maske kiik maibe barak tebes liu rihun ida sira nee normal ona, ba ita laos normal tanba nunka akontese maibe seidauk iha nivel grave nee, no rai monu iha Timor laos premeira vez, hau tinan ruma liu ba hau eis Prezidente ba pasiar iha Letefoho depois ba too iha Ramelau nia hun haree foho tun daudaun, nee akontese maibe seidauk akontese situasaun grave hanesan rai seluk,” katak PR Horta.
Prezidente Republika hatete, rai nakdoko nee impaktu ba komunidade maibe daudaun ho skalaun kiik laos ho nivel boot, maibe karik ho rai nakdoko mak estraga komunidade sira nia uma governu no autoridade munisipiu sira iha meius hodi fo apoiu komunidade sira.
“Impaktu ba komunidade maibe laos ho nivel boot, governu iha meius, munisipiu iha meius para apoiu kedas sira, ita la hatene bele akontese boot liu tan, situasaun nunee, Governu no munisipiu sira iha meius para fo apoiu kedas bele halo uma ba populasaun neebe lakon uma, bele tulun sira ho sasan, animal karik lakon buat sira nee, nee laos problema boot ida ke halo Governu difikuldade tenke ajuda kedas,” dehan Prezidente Republika.
Nunee mos karik akontese El Nino bee sei maran sei hamate mos animal sira hanesan iha Jako nomos fatin seluk tan karik Governu presiza ajuda bee ka lae? hatan ba kestaun nee Prezidente Republika hatete, iha tinan kotuk liu rusa fuik sira Jako mate tanba bee maran sira ba hemu bee tasi, no momentu neeba Primeiru Ministru fo apoiu bee maske seidauk assume kargu nuudar PM, nia rasik mak halo inisiativa lori bee ba Jako.
PR dehan, karik akontese bee maran Governu presiza lori tanki ba tau iha fatin sira nee nunee tau bee hodi rusa sira bele hemu labele mate.
Nunee mos tuir Komunidade Eva Maccarenhas husi Suku Afaloicai, Postu Administrativu Autulari, Munisipiu Viqueque, konta katak daudaun nee rai nakdoko kada loron ida, dala ruma too dala haat hanesan nee, ho ida nee halo sira tauk atu lao sai ba natar no toos tanba tauk rai monu.
Nia konta katak dezde uluk husi kiik nia haree rai nakdoko dala ruma iha maibe dala ida hanesan nee deit, maibe ida agora diferente tebes, tanba iha semana ida nee nia laran rai sempre nakdoko loron ida dala tolu no dala haat.
(eme)
