DILI, STLTIMORLESTE.com – Prezidente Republika (PR), Jose Ramos Horta iha ona hanoin atu kondekora Postumu Orden Timor Leste (TL) ba saudozu Kamal Bin Ahmed Bamadhaj husi Malazia, neebe ema oho iha TL iha tinan 1991 bainhira halo marsa husi Moteal ba Santa Kruz.
Prezidente Republika Jose Ramos Horta ba jornalista iha Palasiu Prezidensial Nicolau Lobato, Bairo Pite, Sesta (19/06/2026) hatete, foin lalais Prezidente viajen ba Malazia hasoru malu ho saudozu nia inan Helen Todd, hodi husu karik iha tempu fulan Novembru bele mai Timor leste hodi partisipa serimonia entrega kondekorasaun ba saudozu kamal.
“Nia mae senhora Helen Todd, nia ema Nova Zelândia, Kamal Bamadhaj, uluk mai iha nee 1991 hau konhese nia, nia uluk estudante Universidade Sydney, hau profesor iha neeba, too agora hau sei vizita profesor iha neeba, nia uluk estudante iha neeba, nia mai hasoru hau iha neeba nia ho nia kolega sira mai tuur iha kantor no nia mai Timor Leste hamutuk ho joven sira iha nee, nia mos partisipa iha marsa ba Santa Kruz husi Motael, momentu neeba mak ema oho nia, nia mae mai iha Timor hela iha Timor tinan 10, iha nee kumpre nia oan nia hanoin mai iha nee tinan 10 nia mak hahu monta NGO moris rasik mikro kreditu moris rasik,” dehan Prezidente Republika.
Prezidente Republika hatete, inan hela iha Timor loke mikro kreditu moris rasik no liu tiha tinan 10 fila ba nia rai, no halo servisu tinan 10 iha Timor Leste hanesan omenajen ba nia oan.
“Momentu neeba hau kondekora nia Helen Todd, agora mak foin hanoin fulan ruma liu ba hanoin atu kondekora postumu Orden Timor Leste nian ba Kamal Bin Ahmed Bamadhaj, tanba nee koalia ho nia se bele nia mai iha fulan Novembru, no nia hatete prontu atu mai iha fulan Novembru, hau halo kondekorasaun ba ordem Postumu ba joven oan nee, momentu neeba hau la hatene nia 20 anos iha Universidade hela,” katak Prezidente.
Foin lalais Prezidente Republika viajen privadu ba Malazia hasoru malu ho Helen Todd, inan husi saudozu Kamal Bamadhaj, hodi koalia kona-ba preparasaun atu entrega postumu Orden Timor Leste nian ba Kamal Bin Ahmed Bamadhaj, tuir Dekretu Prezidente Republika No. 102/2025. Kamal nuudar estudante siensia polítika no ativista direitus umanus neebe mate iha Masakre Dili iha loron 12 Novembru 1991.
(eme)
