DILI, STLTIMORLESTE.com – Organizasaun Nasaun Unida (ONU) sei kolabora ho Governu Timor Leste liu husi ministeriu relevante sira, halo preparasaun hodi responde ba El-Nino neebe sei akontese iha rai laran.
Lia hirak nee hatoo husi Koordenadora Rezidente Nasoins Unidas nian iha Timor Leste, Funmi Balogun ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (18/06/2026) hatete, hasoru malu ho Xefe Estadu koalia kona-ba oinsa halo preparasaun hamutuk hodi hasoru El-Nino neebe sei akontese iha rai laran.
Funmi Balogun dehan, ONU sei halo kolaborasaun ho Governu Timor Leste liu husi Ministeriu relevante sira hodi halo preparasaun hodi responde bainhira akontese.
“Suporta saida mak ONU sei fo ba iha situasaun ida nee mak liu husi haree ba asuntu sira nee ligasaun ho podcast ba klima nian para haree tok eventu ida nee orsida akontese iha neebe iha area ida neebe ida nee mak ONU sei fo suporta sei servisu hamutuk ho Autoridade Protesaun Sivil no mos ministeriu relevante sira oinsa atu bele fo responde kuandu akontese El-Ninu. Neebe servisu agora lao hela no iha ona koordenasaun hamutuk ho ministeriu relevante sira no mos koordenasaun Autoridedade Protesaun Sivil nian no sei enkontru balun tuir mai,” dehan Reprezentante ONU.
Aleinde Prezidente Republika ho Reprezentante ONU mos diskute hamutuk mos konaba objetivu prinsipal mak avalia progresu atividade Nasoins Unidas nian iha país, ho atensaun espesial ba transformasaun sistema alimentar no identifikasaun abordagem integradu sira atu aumenta produtividade agríkola no kombate malnutrisaun iha munisípiu sira neebe vulneravel liu.
Durante audensia, parte rua nee sublina importansia mobiliza investimentu foun ba setor agríkola Timor-Leste nian, atu kompleta rekursu sira neebe Estadu disponibiliza ona. Reprezentante Nasoins Unidas reafirma kompromisu organizasaun nian atu fornese apoiu tekniku imparsial no fasilita parseria estratejika sira, ho objetivu envolve setor privadu no atrai investidor sira husi rejiaun ASEAN atu impulsiona dezenvolvimentu agríkola no hametin seguransa alimentar iha país.
Preparasaun hasoru ameasa fenomenu klimatiku El Nino mos sai hanesan asuntu prinsipal ida iha reuniaun nee. Iha koordenasaun besik ho Autoridade Protesaun Sivíl no ministeriu relevante sira, Nasoins Unidas kontinua apoiu esforsu monitorizasaun no planeamentu atu asegura asesu ba bee no nesesidade bazika sira ba populasaun karik akontese seca.
Iha kontestu ida-nee, reuniaun teknika ohin tuir inisiativa Prezidente Republika nian, ho objetivu hametin koordenasaun institusional no minimiza impaktu potensial husi emerjensia klimatika ida-nee.
(eme)
