DILI, STLTIMORLESTE.com – Prezidente Republika (PR), Jose Ramos Horta simu akordu neebe alkansa entre Estadu Unidus Amerika no Republika Islamika Iraun no akordu nee reprezenta abansu diplomatiku neebe signifikativu.
“Hau simu akordu neebe alkansa entre Estadus Unidus Amerika no Republika Islamika Iraun nian. Akordu ida nee reprezenta avansu diplomatiku ida neebe signifikativu, loke dalan konstrutivu ida ba rezolve konflitu ida neebe iha tempu naruk ameasa estabilidade rejional no fo impaktu boot ba ekonomia global,” dehan PR Horta husi Komunikadu neebe STL asesu Sesta (19/06/2026).
Prezidente espresa nia esperansa katak akordu ida nee sei restaura prinsípiu sira navegasaun livre no seguru liu husi Estreitu Ormuz nian, enkuantu reafirma igualdade soberanu husi nasaun sira hotu nuudar fundamentu prinsipal ba direitu internasional no ko ezistensia pasifika.
“Hau elojia nasaun mediador sira ba sira nia pasiensia, diplomasia, no dedikasaun neebe metin. Sira-nia esforsu neebe la kole hatudu ona katak dialogu, laos konfrontu, mak dalan neebe seguru liu ba solusaun sira neebe dura,” katak nia.
Xefe Estadu husu ba parte rua atu kumpre sira-nia kompromisu sira ho boa-fe no atu hasoru dezafiu sira iha futuru ho espíritu respeitu ba malu no envolvimentu konstrutivu neebe halo akordu ida-nee sai posivel.
“Hau mos husu ba komunidade internasional partikularmente mediador sira no orgaun multilateral sira atu kontinua envolve ativamente hodi fo apoiu ba implementasaun akordu ida-nee ho kompletu no transparente. Kooperasaun internasional neebe sustentavel sei esensial atu garante ninia susesu no durabilidade.” dehan Horta.
Xefe Estadu hatete, atake hotu hotu hasoru nasaun sira Golfu nian tenke hapara kompletamente, Izrael tenke hapara atake hotu hasoru Líbanu, para atu labele invade iha teritoriu soberanu libanes nian, hapara atake hotu hasoru Síria, no hapara dala ida ba atake sira hotu hasoru Gaza, para ho tentativa sira atu okupa fali Gaza, para ho ninia tinan 80 negasaun ba realidade palestinianu no direitu husi ema palestinianu sira ba Palestina ida- neebe independente no soberanu.
Hein katak akordu ida-nee sai nuudar sinal esperansa nian ba pas neebe dura iha rejiaun Golfu no iha mundu tomak.
(eme)
