DILI, STLTIMORLESTE.com – Ministru Interior (MI), Francisco da Costa Guterres hatete, Membru Polisia Nasional Timor Leste (PNTL) nain 200 resin sei tama reforma ho dignu iha tinan 2027.
Nia esplika, sira nia naran sei publika iha fulan Setembru too fulan Novembru tinan nee, no Governu foka ba reforma dignu liu husi hadia pensaun.
“Kuaze nain 200 resin mak tama ba reforma iha tinan 2027, tanba tuir lo-loos nain 158 nee sira reforma iha tinan kotuk ona, maibe tanba dehan estatutu neebe mak aprova entaun sei iha tan tinan rua hodi prepara sira nia kondisaun hotu molok re-integra ba iha komunidade. Reforma dignu nee mak diskusaun sei lao hela,” hatete Ministru Interior (MI), Francisco da Costa Guterres ba jornalista sira iha MI, Sesta (19/06/2026).
Nia esplika, governu iha obrigasaun atu fo reforma dignu ba nia ema sira, liu-liu ba membru PNTL, kuandu pasa ba reforma tenke trata sira ho dignu. Reforma dignu nee haree ba hadia reformadu sira nia pensaun.
“Ita tenke haree hodi hadia sira nia pensaun para pelumenus uluk sira sei ativu hanesan polísia nee sira nia salariu hira, agora sira ba reforma nee sira nia pensaun reforma hira, nunee ita bele fo buat diak ba sira atu sira bele goza iha sira nia reforma ida nee,” nia informa.
Iha fatin hanesan, Akademista UNTL, Julio da Silva informa, PNTL neebe idade 60 nee tenke reforma ona, tanba sira nia idade la permite atu kontinua servisu iha Instituisaun PNTL, tanba sira balun lao labele ona no balun kestaun moras nee presiza deskansa ona.
“Ita haree Membru PNTL sira barak mak komesa katuas ona, tanba nee husu ba Governu atu reforma sira ho dignu, tempu sira atu deskansa hodi hamutuk barak ho familia, ita haree balun moras, balun struk lao labele, sira neebe presiza deskansa barak atu rekopera sira nia saude, hau hanoin labele too tinan 2027, diak liu iha tempu badak nia laran,” nia afirma.
(jen)
