DILI, STLTIMORLESTE.com – Prezidente Republika (PR), Jose Ramos Horta hatoo ksolok gratidaun ba Primeiru Ministru (PM), Kay Rala Xanana Gusmão, neebe selebra aniversariu ba dala 80.
Prezidente Republika hatoo parabens ba PM Xanana iha loron espesial neebe selebra iha loron Sabadu (20/06/2026).
“Hau nia maun no belun, Avo Nana, iha loron importante ida nee, bainhira nasaun no mundu selebra tinan 80 ba ita-nia moris, hau espresa hau nia admirasaun pesoal, gratidaun no domin maun alin ba ita,” dehan PR Horta.
Prezidente Republika hatete, durante dekada ualu nia laran, PM Xanana nia moris sai nuudar testemunha ida ba aten-barani, reziliensia no domin ida neebe la nakdoko ba rai doben Timor Leste.
“Ita mak sei sai nafatin fuan ba ita nia nasaun nia luta no nia espíritu neebe dura. Ohin loron, lian neebe povu Timor Leste rekonhese instantaneamente, lian neebe moris ona iha sira nia fuan durante jerasaun ida mak lian lejenda moris nian. Povu bolu ita-boot Avo Nana, termu ida ho domin neebe klean tebes, no sira halo nunee tanba sira hatene, hanesan hau hatene, katak ita-boot mak sira nia eroi ida ba ita-nia nasaun nia independensia,” dahan PR Ramos.
Xefe Estadu hatete, PM Xanana nia viajen estraordinariu husi foho sira rezistensia nian, liu husi susar sira kapturasaun no dadur nian, ba kargu aas liu estadu nian mak istoria ida neebe sei konta ba sekulu barak.
“Iha ita nia tinan ba 80 ida nee, hau agradese ba ita-nia sakrifísiu, ita- nia vizaun, no ita-nia amizade neebe metin. Ita maka símbolu ida ba ita-nia istoria no esperansa ba foin sae sira,” katak PM.
Maromak kontinua haraik bensaun, saude, matenek no ksolok neebe merese tebes.
Ho respeitu klean no solidariedade fraterna husi PR Ramos Horta.
(eme)
