DILI, STLTIMORLESTE.com – Prezidente Republika (PR), José Ramos Horta konsidera eis Prezidente Republika Francisco Guterres Lu-Olo nia mate hanesan lakon boot ida ba povu Timor Leste.
Horta hato sentidu solidariedade no kondolensia ba esposa, oan sira no membru familia no kuadru no militante sira husi FRETILIN no Timor oan neebe lakon ona Francisco Guterres “Lu-Olo”.
Tuir Horta, Lu-Olo nia mate nee hanesan lori tristeza boot ida ba povu Timor Leste, tanba lakon ona eroi nasional ida neebe dedika nia aan tomak iha prosesu luta ba ukun rasik aan inklui iha prosesu dezenvolvementu nasaun nian.
“Hau simu informasaun nee ho tristeza boot tebes no konsidera matebian Prezidente Francisco Guterres Lu-Olo hanesan lakon ida boot ba nasaun,” haktuir nota komunikadu imprensa neebe STL asesu husi pajina facebook ofisial Ramos Horta segunda nee (22/06/2026).
Horta konta katak foin, lalais nee halo vizita estadu ba Malazia iha loron 13 to 16 junhu, vizita mos Lu-Olo iha sala kuidadu intensivu.
Nia dehan, tuir informasaun neebe doutor espesialista ida aprezenta ba espoza Cidália Lopes Nobre Mouzinho Guterres katak kondisaun lider nasional nee hahu grave.
“Hau hetan informasaun katak kondisaun kliniku Prezidente Francisco Guterres Lu-Olo grave tebes. Tanba respeitu ba privasidade pasiente no família, bainhira fila mai Díli, hau deit hatete ba jornalista sira katak hau ba ospital atu hatene kona-ba estadu saúde ex-Prezidente Republika Dr. Francisco Guterres Lu-Olo, la fo detallu kona-ba nia kondisaun kliniku,” dehan nia.
Horta akresenta liu tan katak, eis Prezidente Francisco Guterres Lu-Olo mak patriota boot ida, ida husi lider sentral sira iha luta libertasaun, lider husi partidu istoriku FRETILIN, no mos halo ona knaar aas hotu iha Estadu.
Nia mos reforsa katak, kontaktu ona Embaixador Timor-Leste iha Malazia atu koordena asaun nesesariu hotu, hamutuk ho familia no estrutura Estadu sira, atu lori mate isin mai Timor-Leste.
“Hanesan mos, hau kontaktu ona AERODILI atu prepara vook especial ida ba transporta mate isin no membru familia sira. Prezidensia Republika, iha koordenasaun ho orgaun Estadu seluk sira, sei fo apoiu tomak no onra Estadu tomak ba Prezidente Francisco Guterres Lu-Olo,” nia sublina.
Lu Olo mate ohin iha Hospital Prince Court, iha Kuala Lumpur, ho tinan 71, hafoin hala’o tratamentu intensivu.
Entretantu Francisco Guterres “Lú-Olo”, Moris iha Ossu, Distrito Viqueque, iha 7 Setembro 1954.
Lú-Olo kaben ho Cidália Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dália Luliana Nobre Guterres.
(eme)
