DILI, STLTIMORLESTE.com – Vise Primeiru Ministru, Ministru Koordenador ba Asuntu Sosias, no Ministru Dezenvolvimentu Rural no Abitasaun Komunitaria, Mariano Assanami Sabino hatoo sentidu kondolensia klean ba familia no estrutura Partidu FRETILIN neebe lakon ona Francisco Guterres Lu-Olo.
“Ho laran triste neebe klean, hau hatoo kondolensia profundu ba família enlutada, ba familia FRETILIN no ba povu tomak Timor-Leste tanba partida eterna husi Sua Exelénsia Dr. Francisco Guterres “Lú-Olo”,” haktuir nota komunikadu imprensa neebe STL asesu husi pajina facebook ofisial husi vise Primieru Ministru, Mariano Assanami Sabino, Segunda (22/06/2026).
Nia dehan, Timor-Leste ohin lakon tan Patriota ida, Líder ida no Estadista ida neebe durante nia moris tomak dedika nia-an tomak ba luta libertasaun nasional, ba dame, unidade no dezenvolvimentu nasaun.
Tuir Assanami, Lu-Olo ninia partida husik mamuk ida neebe todan ba povu tomak. Maibe ninia servisu, ninia lideransa no ninia sakrifísiu ba rai nee sei hela nafatin iha memoria no konsiensia nasaun nian,” haktuir komunikadu.
Tan nee uuudar Prezidente FRETILIN, eis-Prezidente Republika Demokrátika Timor-Leste, Prezidente Asembleia Konstituinte no eis-Prezidente Parlamentu Nasional, Francisco Guterres “Lu-Olo” marka ona fatin ida neebe importante iha istoria Timor-Leste.
“Ninia kontribuisaun ba ukun-an, soberania no konsolidasaun demokrasia sei la haluha ba nafatin. Iha momentu lutu ida-nee, ami hamutuk ho familia no povu tomak hodi fo omenajen ikus ba líder ida neebe nia moris tomak dedika ba povu no nasaun, Ita husik ona ami, maibe ita nia mehi, ita nia luta sei moris nafatin iha povu Timor-Leste nia fuan,” dehan nia.
Entretantu Francisco Guterres “Lú-Olo”, Moris iha Ossu, Distrito Viqueque, iha 7 Setembro 1954.
Lú-Olo kaben ho Cidália Lopes Nobre Mouzinho Guterres, no sira iha oan nain-haat, Francisco Cidalino, Eldino Nobre, Felezito Samora Guterres no Dália Luliana Nobre Guterres.
(alb)
